Шинэ коронавирусийн халдвараас сэргийлэх ажлын хүрээнд Монгол Улсын Засгийн газар, Улсын Онцгой комиссоос БНСУ, Япон улс болон Европын улсуудад байгаа хүндэтгэн үзэх шалтгаантай Монгол Улсын иргэдийг Сөүл, Токио, Москва, Берлин, Истанбул хотоор дамжуулан татан авахаар шийдвэрлэсэн. Энэ хүрээнд өчигдөр буюу гуравдугаар сарын 15- нд БНСУ-аас 244 иргэнээ тусгай нислэгээр авч ирсэн бол өнөө өглөө Берлин-Москва-Улаанбаатарын ОМ-136 тусгай нислэгээр 231 иргэн эх орондоо ирлээ. Түүнчлэн өнөөдөр Токио руу, энэ сарын 18-нд Истанбул руу тусгай нислэг үйлдэнэ. Тусгай нислэгээр ирж буй иргэдийг ирсэн даруйд 14 хоног тусгаарлаж, ачаа тээшийг ариутгаж халдваргүйжүүлж байгаа.
Т.Хуншагай
