Шинэ коронавирусийн халдвар буюу COVID-19 цар тахал нь дэлхий нийтээр тархаж аюул дагуулаад буй. Иймд Монгол улсын Засгийн газар УОК-ын шийдвэрээр халдвар тархсан бүс нутгаас иргэдээ татан авч байгаа. Тиймээс БНСУ, ЯПОН улсаас ирсэн иргэдийг “Нэг хүн-нэг өрөө” зарчмын дагуу иргэдийг тусгаарлахад томоохон зочид буудлуудыг дайчлах аж.
Хурандаа Б.Ууганбаяр: “Шаардлагатай тохиолдолд Нийслэлийн Засаг даргын захирамжаар зарим зочид буудлыг дайчлан, иргэдийг тусгаарлахад ашиглана. Энэ нь олон нийтийн эрүүл мэндийг хамгаалах алхам бөгөөд одоогоор өөр гарц, гаргалгаа байхгүй тул биднийг зөвөөр ойлгохыг хүсэж байна” хэмээлээ. Түүнчлэн Тусгаарлалтын 14 хоногийн хугацаа нь дууссан иргэд гэртээ дэглэм сахих учиртай. Ийм шаардлага тавьж, гарын үсэг зуруулж буй. Гэтэл зөрчил гаргах тохиолдол бүртгэгдэж байна.
Сэлэнгэ аймагт тусгаарлагдаад, Улаанбаатар хотод ирсэн иргэн хоёр, гурав хоногийн турш архидан согтуурсан байна. Тэр хүнд хариуцлага тооцно. Одоо хамгийн эгзэгтэй, чухал үе. Өвчин нууц үедээ байхад гадуур явж байж халдвар тараах вий гэдгээс сэрэмжлэх хэрэгтэй.
О.Гоо-Оюун