"Иргэдийн шударга шүүх" ТББ-ын тэргүүн, хуульч Х.Бат-Ялалтыг 2016 оны УИХ-ын сонгуулийн үеэр өмнөх парламентын үед гишүүн асан Л.Эрдэнэчимэгийг шантаажилж 50 сая төгрөг авсан хэрэгт Эрүүгийн хуулийн 17.6-д заасан “Бусдын эд хөрөнгийг авахаар заналхийлэх” гэх үндэслэлээр эрүүгийн хэрэг үүсгэн шалгаж байгаа. Улмаар өнгөрсөн баасан гаригт түүнийг нэг сар цагдан хорих шийдвэр гаргасан. Уг шийдвэрийг Х.Бат-ялалт эсэргүүцэн түүний өмгөөлөгч С.Даваасүрэн гомдол гаргаснаар гомдлыг энэ сарын 30-ны өдөр хянан хэлэлцлээ. Шүүх хуралдаанд яллагдагчийн өмгөөлөгч С.Даваасүрэн болон Х.Бат-Ялалт нарыг оролцуулан хийж энэ сарын 27-ны өдрийн 75/Я дугаартай яллагдагчаар цагдан хорих таслан сэргийлэх арга хэмжээ авах тухай шүүгчийн захирамж нь хууль ёсны үндэслэлтэй гэж үзсэн тул Ерөнхий шүүгчийн захирамжаар гомдлыг хангахгүй орхиж, шүүгчийн захирамжийг хэвээр үлдээн шийдвэрлэлээ.
О.Гоо-Оюун