Шинэ коронавирусийн халдвар буюу covid-19 цар тахал Монгол улсад бүртгэгдсэнтэй холбогдуулан манай улс хөл хорио тогтоогоод байгаа билээ. Тиймээс иргэдийн орлогын эх үүсвэр алдагдаж, жижиг дунд үйлдвэрлэл эрхлэг нар ажлын байраа алдахад хүрээд байна гэх мэдээлэл тархаад байсан юм. Тэгвэл халдварын улмаас эдийн засагт үзүүлэх сөрөг нөлөөлийн тод жишээ “Говь” ХК болж. Борлуулалт муудсаны улмаас нийт ажилчдынхаа 50 хувийг цомхотгож 250 иргэн ажилгүй болоод байна.
Тус компаниас өгч буй мэдээллээр: “2020 оны эхний улиралд Монгол Улсад айлчлах байсан жуулчдын урсгал 100% тасарсан, нөгөө талаар энэ жилийн сар шинийг тэмдэглээгүй болон хөл хориотой холбоотойгоор Говь брэндийн дэлгүүрийн борлуулалт их хэмжээгээр зогслоо. Мөн гадаад захиалагч нар ч нөхцөл байдлаас үүдэн бараа бүтээгдэхүүний захиалгуудаа цуцаллаа. Үүнтэй холбоотойгоор үйлдвэрлэх бараа материалын тоо ширхэг, хэмжээ буурч, хэвийн үеийн үйлдвэрлэл, үйл ажиллагааны горимд өөрчлөлт орлоо. Тиймээс үүсээд байгаа нөхцөл байдлыг даван гарахад ийнхүү хүндрэл учирсан тул 250 ажилтныг цомхотгохоос өөр аргагүй байдалд хүрлээ” гэв.
Э.Сувдаа
