Өнгөрөгч сард 2020 оны УИХ-ын сонгуулд оролцох улс төрийн намууд мөрийн хөтөлбөрөө Үндэсний аудитын газарт хүргүүлсэн. Тэгвэл өнөөдөр буюу /2020.04.06/ өдөр Үндэсний аудитын газраас мэдээлэл өгөв. Мэдээллийн үеэр МАН, АН-ын мөрийн хөтөлбөр хэрэгжих боломжгүй гэх дүгнэлт гарсан. Тиймээс ажлын тав хоногт мөрийн хөтөлбөрөө засаж хүргүүлэхийг намуудад үүрэг болгов. Харин УИХ-д суудалгүй 7 намын мөрийн хөтөлбөр шалгуурт нийцсэн гэдгийг онцоллоо.
Хэрэгжих боломжгүй мөрийн хөтөлбөр хүргүүлсэн МАН, АН -ын төлөөллүүд өнгөрөгч сард өөрсдийн намын мөрийн хөтөлбөртөө сэтгэл хангалуун байсан санагдах юм. Тухайлбал
Уих гишүүн АН дэд дарга З.Нарантуяа: Улс төрийн намуудын мөрийн хөтөлбөр бол үйл ажиллагааны бодит төлөвлөгөө байх ёстой. Ардчилсан нам мөрийн хөтөлбөр боловсруулахдаа энэ зарчмын дагуу хандаж, ажиллаж байна. Ер нь улс төрийн намууд ард түмэнд таалагдах, илүү их санал авахын тулд хий хоосон, мөрөөдлийн амлалтууд өгсөөр ирсэн шүү дээ. Тэгвэл энэ удаад Ардчилсан нам энэ байдлаас татгалзъя .АН-ын мөрийн хөтөлбөр “Монгол өрх- Хөгжлийн бодлого” нэртэй. Монгол айл өрх бүрийн амьдралын чанарт эрс өөрчлөлт хийх бодлого боловсруулсан. Иргэдийн хөдөлмөрийн хөлсний доод хэмжээг 3 сая төгрөг болгоно. Ардчилсан Нам мөрийн хөтөлбөрийн төслийг боловсруулахдаа нийгмийн бүлэг бүрийн төлөөлөл болсон ТББ, ААН, холбоод, эрдэмтэн, судлаачид зэрэг нийт 20 гаруй мянган иргэдийн саналыг хүлээн авч, нэгтгэн боловсруулсан.
МАН гишүүн ЗГХЭГ-ын дарга Л.Оюун-Эрдэнэ: “Манай намын мөрийн хөтөлбөр бол “Алсын хараа-2050” эх орны хөгжлийн урт хугацааны хөтөлбөрийн эхний дөрвөн жилийн үйл ажиллагааны хөтөлбөр юм. Алсын хараа хөтөлбөрийг нэг жилийн хугацаанд 1500 гаруй эрдэмтэн судлаач оролцож боловсруулсан. Төрийн болон ТББ, хувийн хэвшлийн төлөөлөл давхардсан тоогоор нийт 302 мянган иргэн санаа өгсөн. Одоо уг хөтөлбөрийг УИХ-аар хэлэлцэн батлуулахаар өргөн бариад байна. Чингис, Самурай, Мазаалай бондын өр болох 1.2 тэрбум ам.долларын өрийг төлнө. Энэ бүхэнд үндэслэн хөтөлбөрөө боловсруулсан. Мөрийн хөтөлбөрийн гол үнэт зүйл нь дундаж орлоготой иргэдийг дэмжих зорилготой, эдийн засаг өрх бүхэнд хүртээмжтэй байх талыг илүү харснаараа ач холбогдолтой” гэж байсан юм.
Т.Хуншагай
