Дархан уул аймаг дахь Политехник коллежийн захирал Ч.Лхагвасүрэн нь Хөдөлмөр нийгмийн хамгааллын сайдын 2017 оны 1 дүгээр сарын 25 ны Б/37 тушаалаар ажлаас чөлөөлөгдсөн байна. Тушаалын үндэслэлд Ч.Лхагвасүрэнг өөрийн хүсэлтээр албан тушаалаасаа чөлөөлөгдөв гэж тусгасан байна. Гэвч Ч.Лхагвасүрэн нь ажлаас чөлөөлөгдөх хүсэлт гаргаагүй учир шүүхэд хандсан байна. Гурван шатны шүүх хуралдаанаас Хөдөлмөр нийгмийн хамгааллын сайдын 2017 оны 1 дүгээр сарын 25 ны Б/37 тушаал үндэслэлгүй тул Ч. Лхагвасүрэнг албан тушаалд нь эргүүлэн томилох шийдвэр гарсан. Гэвч уг шийдвэр одоог хүртэл хэрэгжихгүй байна.
Чингэлтэй дүүргийн иргэний хэргийн анхан шатны шүүхээс 2017 оны зургадугаар сарын 27 нд хөдөлмөрийн тухай хуулийн 128 дугаар зүйлийн 128.1.2-т заасныг баримтлан Монгол улсын хөдөлмөр нийгмийн хамгааллын сайдын 2017 оны 1 дүгээр сарын 25-ны өдрийн Б/37 дугаар “Ажлаас чөлөөлөх тухай” тушаалыг хүчингүй болгож Ч.Лхагвасүрэнг Дархан-Уул аймаг дахь мэргэжлийн сургалт үйлдвэрлэлийн төвийн захирлын ажилд эгүүлэн тогтоосугай гэх шийдвэр гарсан.
2017 оны 9 дүгээр сарын 6 ны өдрийн Нийслэлийн иргэний хэргийн давж заалдах шатны шүүх магадлалаар Монгол улсын Хөдөлмөр нийгмийн хамгааллын сайдын 2017 оны 1 дүгээр сарын 25 ны өдрийн Б/37 дугаарт тушаалыг хүчингүй болгож ажил албан тушаалд эгүүлэн томилох Чингэлтэй дүүргийн иргэний хэргийн анхан шатны шүүхийн 2017 оны зургадугаар сарын 27 ны өдрийн 182/шш2017/01408 дугаар шийдвэрийг хэвээр үлдээх шийдвэр гарсан. 2017 оны 12 дугаар сарын 26 ны өдрийн Монгол улсын дээд шүүхийн хяналтын шатны иргэний хэргийн шүүх хуралдааны тогтоолоор Чингэлтэй дүүргийн иргэний хэргийн анхан шатны шүүхийн 2017 оны зургадугаар сарын 27 ны өдрийн 182/шш2017/01408 дугаар шийдвэр, Нийслэлийн иргэний хэргийн давж заалдах шатны шүүхийн 2017 оны 9 дүгээр сарын 6 ны өдрийн өдрийн 1990 магадлалыг тус тус хэвээр үлдээх шийдвэр гарсан байна.
Иргэн Ч. Лхагвасүрэн нь гурван шатны шүүхийн шийдвэр хэрэгжихгүй байгаа талаар Монгол улсын Засгийн газрын хэрэг эрхлэх газарт хандсан юм.
Өргөдлийн дагуу 2018 оны 8 дугаар сарын 31 ны өдөр Монгол улсын Засгийн газрын хэрэг эрхлэх газрын дэд дарга У.Бямбасүрэн 2019 оны 1 дүгээр сарын 7 ны өдөр Монгол улсын Засгийн газрын хэрэг эрхлэх газрын дарга Г.Занданшатар, 2019 оны 9 дүгээр сарын 11 ны өдөр Монгол улсын Засгийн газрын хэрэг эрхлэх газрын дарга Л.Оюун-Эрдэнэ нар Ч.Лхагвасүрэнд холбогдох шүүхийн шийдвэрийг хэрэгжүүлэхийг Хөдөлмөр нийгмийн хамгааллын сайд С.Чинзоригт үүрэг болгосон байна.
Мэргэжлийн боловсрол сургалтын байгууллагын тухай хуулийн 8.4.13-т зааснаар төрийн өмчийн мэргэжлийн боловсрол, сургалтын байгууллагын захирлыг сонгон шалгаруулалтын дүнг үндэслэн томилох, хуульд заасан үндэслэлээр чөлөөлөх, ажлын байрын тодорхойлолтыг батлана хэмээн тусгасан байна. Тиймээс иргэн Ч.Лхагвасүрэн салбарын сайдад хандахад ХНХ-ийн сайд С.Чинзориг шүүхийн шийдвэрийн дагуу Ч.Лхагвасүрэнгийн шүүхийн шийдвэрийг биелүүлэх талаар төрийн нарийн бичгийн дарга Г.Өнөрбаярт үүрэг болгосон юм.
Хөдөлмөр нийгмийн хамгааллын яамны төрийн нарийн бичгийн дарга Г.Өнөрбаяр 2020 оны 3 дугаар сарын 26 ны өдөр шүүхийн шийдвэрийг илт гуйвуулан алдаатай албан бичгийг Дархан –Уул аймаг дахь политехник коллежид хүргүүлсэн байна. Улмаар Дархан-Уул аймаг дахь Политехник коллежийн захирлын үүргийг түр орлон гүйцэтгэгч Б.Нарантуяа нь Ч.Лхагвасүрэнгийн албан тушаалыг өөрчилсөн байна.
Шат шатны байгууллагаас Ч.Лхагвасүрэнг албан тушаалд нь эргүүлэн томилох шийдвэр гараад байхад яагаад хэрэгжихгүй гурван жил болов? хэрэгжихдээ шүүхийн шийдвэрээс гажууд байгаа нь хэн нэгний ашиг сонирхолын зөрчил байна уу?
Бид энэ талаар эргэн мэдээлэх болно...
Т.Хуншагай
