Баянгол дүүргийн Эрүүл мэндийн төвийн дарга З.Балдандугар эмч ажилчдаа дарамталж, цалин урамшууллыг хассан, ажлаас нь хууль бусаар халсан тухай мэдээлэл сүүлийн үед цахим орчинд тархсан.
Үүнтэй холбогдуулан Баянгол дүүргийн Засаг дарга С.Одонтуяа дүүргийнхээ хүүхдийн эмнэлэгийн үйл ажиллагаатай танилцжээ.
Энэ үеэр эмч, ажилчид нь бодит байдлыг танилцуулж, удирдах албан тушаалын орон тоонд ажилтан авч байгаа учраас эмч, ажилчдын цалинг хасах, урамшууллыг нь олгохгүй байх, цалингаас нь хасч байгаа тухай ярьжээ.
Түүнчлэн хүүхдийн эмнэлэгийн ахлах сувилагчийг ажлаас нь халсан өрх толгойлсон сувилагчийн бүтэн жилийн үр дүнгийн урамшууллыг хассан тухай мэдэгдсэн байна. Одоогийн байдлаар Баянгол дүүргийн эмнэлгийн байгууллагаас халагдсан арав гаруй хүн шүүхэд гомдол гаргажээ. 2019 оны долдугаар сард З.Балдандугар Байнгол дүүргийн Эрүүл мэндийн төвийн даргаар ирснээсээ хойш нилээдгүй хүнийг ажлаас нь халж, олон хүнийг шинээр ажилд авснаар өнөөгийн нөхцөл байдал бий болжээ.
Баянгол дүүргийн Засаг дарга С.Одонтуяа “COVID-19 халдварт өвчний үед эрүүл мэндийн салбарын ажилчдад ачаалалтай, ажиллаж байгаа. Ийм байхад эмнэлгийн эмч, ажилчдыг ажлаас нь халах, цалин урамшууллыг нь олгохгүй байх, эрүүл мэндийн салбарыг улстөржүүлэх зэрэг нь байж болохгүй асуудал. Бид эмч нараа хамгаалах ёстой. Тиймээс яаралтай ажлын хэсэг гарган ажиллаж, энэ асуудлыг шийдвэрлэх болно” хэмээн мэдэгджээ
