Шинэ Зеландын Крайстчерч хотын сүмүүдэд өнгөрсөн оны 3 дугаар сарын 15-нд халдлага үйлдсэн Австралийн иргэн Брентон Харрисон Таррантад шүүх хугацаанаасаа өмнө суллагдах эрх олгохгүйгээр насаар нь хорих ял оноожээ.
“Таны үйлдсэн хэрэг бол таныг насаар нь хорьсон ч тохирох шийтгэл болж чадахааргүй хүний ёсноос гадуур үйлдэл юм. Танд өр зөөлөн сэтгэл алга. Та бол алуурчин төдийгүй террорист юм” хэмээн шүүгч Кэмерон Мандерийн дүгнэлтэд дурджээ. Гэмт этгээд террорист халдлага үйлдсэний улмаас 51 хүн амь үрэгдэж, 38 хүн шархаджээ.
Ялын тогтоолыг сонссоныхоо дараа өөрт нь оноосон ялыг эсэргүүцэхгүй байгаагаа Б.Таррант мэдэгджээ. Тэрбээр Оклендийн шоронд хоригдох аж.
Шинэ Зеландын Ерөнхий сайд Жасинда Ардерн шүүхийн шийдвэрийг сайшаажээ. Шинэ Зеландын сайд нарын танхим хэрэгтнийг нутаг буцааж, тэндээ ялыг нь эдлүүлэх тухай шийдвэрийг хожим нь гаргаж магадгүй байна.
Эх сурвалж: СИДНЕЙ. /The New Zealand Herald/
