Францын нийслэл Парис хотын нэгэн дунд сургуулийн түүхийн багш сурагчдадаа исламын шашны зөнч Мухаммедын шог зургийг хичээлийн үеэр үзүүлсний төлөө амь насаа алджээ. Мухаммедыг шоглон доромжиллоо гэж үзсэн ислам эрчүүд багшийг гадаа гудамжинд барьж, балиусаар толгойг нь тас цавчижээ. Дээрх гэмт хэрэгтнүүдийн үйлдлийг журамлахаар очсон эргүүлийн цагдаа нарын өөдөөс хутга барин давшиж, эсэргүүцэл үзүүлсэн тул тэднийг газар дээр нь буудахаас өөр зам цагдаа нарт үлдээгүй байна. Зөнч Мухаммедын шог зургийг сурагчдад тэрхүү түүхийн багш үзүүлэх болсон шалтгаан нь Парис хотод үргэлжилж буй шүүх хуралтай холбоотой байсан байна. 2015 онд Шарли Эбдо сэтгүүлийн газарт болсон террорист халдлагын хэргийг шүүх хурал Парис хотод ид үргэлжилж буй юм байна.
Тухайн үед зөнч Мухаммедын шог зургийг нийтэлснийхээ төлөө сэтгүүлийн редакц халдлагад өртөж, 12 хүн амиа алдсан тухай түүхийн багш тайлбарлахдаа Мухаммедын шог зургийг үзүүлчихсэн нь амь насаа алдахад хүргэжээ. Энэ хэрэг дээрх хичээл орсноос нэлээд хэд хоногийн дараа болсон байна. Зөнч Мухаммедын шог зургийг үзүүлсэн тэрхүү хичээл орсноос хойш муслим гарал үндэстэй нэлээд олон сурагчийн эцэг эхээс сургуулийн захиргаанд гомдол ирж байсныг өнөөдөр сургуулийн захиргаа дэлгэж байна. Гэхдээ л тэдгээр гомдол гаргасан сурагчдын ар гэр, эцэг эх, хамаатан садан тэдгээр гэмт хэрэгтнүүдийн дотор байгаагүйг Францын Цагдаагийн байгууллага тогтоожээ. Дэндүү харгисаар үйлдсэн гэмт хэргийн газар Францын ерөнхийлөгч Эммануэл Макрон өөрийн биеэр очиж үзэл бодлоо чөлөөтэй илэрхийлэх нь ардчиллын гол ололтын нэг. Энэ үзлийг дэлгэрүүлж, үзэл бодлоо илэрхийлэх хичээл заасны төлөө түүхийн багш амиа алдлаа. Энэ бол аллага. Үүнийг “исламын террорист халдлага” гэж үзэж байна гэж тэрбээр байр сууриа илэрхийлсэн. Мөн Францын парламент ч чуулж, алагдсан багшид хүндэтгэл үзүүлжээ. Мороко улсад албан ёсны айлчилж байсан Францын дотоод хэргийн сайд Жеральд Дарманин ч айлчлалаа зогсоож, Парист яаралтай буцаж ирсэн нь Францын төр засгийн бүх түвшинд уг гэмт хэрэгт дээд зэргийн анхаарал тавьж буйг илтгэлээ. Мөн Францын Боловсролын сайд Жан Мишель Бланкер уг хэргийг зөвхөн хувь хүний эсрэг биш, Францын Бүгд Найрамдах Улсын эсрэг үйлдсэн халдлага гэж нэрлээд исламын терроризмийн эсрэг нэгдэхийг иргэдэд уриалсан байна. Одоогоор гэмт хэрэгтнүүдийг газар дээр нь устгаснаас өөр мэдээллийг гадагш нь цацаагүй хэвээр байна.
Франц улс нь баруун Европт хамгийн олон буюу 5 сая орчим муслим хүн амтай гэдгээрээ онцлогтой. Өөрөөр хэлбэл арабчуудад албан бусаар " эзлэгдсэн" европын улс юм. Францын колони байсан Африк, Арабын улс орны цагаачид Францад дүүрсэн. Тиймээс Исламын шашин нь шүтэгчийнхээ тоогоор Францад хоёрт ордог болсон. Сүүлийн үед тус улсад чечен иргэдтэй холбоотой гэмт хэрэг олноор гарах болсон байна. Газрын дундад тэнгисийн эргийн Ницца хот, баруун бүсийн Сэйн Дизиер хотуудад чеченүүдтэй холбоотой гэмт хэрэг, хүчирхийлэл сүүлийн саруудад олон удаа гарч байгаа. Тиймээс гэмт хэргийн ул мөр нь Чеченүүдтэй холбоотой байх магадлалыг Цагдаагийн газраас дэвшүүлсэн байна. Тухайлбал, Москвад төрсөн 18 настай чечен залуу аллагыг үйлдсэн гэж Францын зарим хэвлэлд бичиж эхэлсэн байна. Чеченүүд яагаад Францад олноороо оршин суух болсныг 1990-ээд оны үед ОХУ-д болсон Чечений дайнтай холбож тайлбарлаж байна. Тухайн үед Франц улс чеченээс дүрвэсэн олон иргэдэд улс төрийн орогнол олгосон ажээ. Ийнхүү түүхийн багшийн толгойг гэгээн цагаан өдрөөр гудамжинд тас цавчсан гэмт этгээд нь Чеченээс гаралтай байх магадлал өндөр болжээ.
