Гадаад, дотоодын компаниудад Монголын нэрийн өмнөөс үг хэлдэг хүн нь ЗГХЭГ-ын дарга Оюун-Эрдэнэ гэж ойлгогдох болсон. Монголд ямар үйл явдал өрнөх, Засгийн газар улс төр ямар, эдийн засгийн ямар курс чиглэл баримтлахыг өнөөдөр ганцхан хүн мэддэг, олон нийтэд илэрхийлдэг болсон гэж дүгнэхэд хүргэжээ. Тэр хүн нь ЗГХЭГ-ын дарга " spokesman" Оюун-Эрдэнэ болжээ. Монгол улсын ерөнхийлөгч Баттулга, ерөнхий сайд Хүрэлсүх, УИХ-ын дарга Зандан шатар, Сангийн сайд Хүрэлбаатар нар ч түүний зиндаанд хүрэхээ больсон аж. Бүхнийг мэдэгч, бүхнийг шийдэгч, бүхнийг мэдээлэгч Оюун-Эрдэнэ Монголд үйл ажиллагаагаа явуулж буй гадаадын Элчин сайдын Яам, гадаадын хөрөнгө оруулалт бүхий компанийн анхааралд аргагүй өртсөн байна. Ялангуяа Оюу-толгой компанийг эзэмшигч “Рио Тинто” компани Засгийн газрын өмнөөс асуудлыг сөхөх болсон Оюун-Эрдэнэтэй л хэл амаа ололцчих, аль болох зөрчилдөхгүй байх байр сууринд шилжсэнийг анзаарч болно. Рио Тинто компанийн удирдлагууд Монголын Засгийн газрын шахалтаас гарах арга замаа ч эрэлхийлж байна. Оюун-Эрдэнийн толгойлсон Монголын Засгийн газрын баг Рио Тинтой компанитай өнөөг хүртэл 11 асуудлаар хэлэлцээ хийсэн ч, үр дүн багатай хэвээр. Рио Тинто компани нь цаг хожих, гэрээг хэлэлцэх асуудлыг аль болох удаашруулахын тулд компанийхаа удирдлагуудыг шат дараалан сольж эхэлсэн. Нэгийг биш, нэг хэсгийг солих үйл ажиллагаа нь ирэх оны дөрөвдүгээр сар хүртэл үргэлжлэх болжээ. Энэ хэмжээгээр Оюу-толгойг шалгах, гэрээг өөрчлөх явц сунжирна гэсэн үг. Одоогоор тус компанитай хийж буй татварын маргаан Арбитрын шүүх дээр үргэлжилж буй. Рио-Тинто-г дотоодын хүчээр хүчрэхгүй болжээ гэдгийг Оюун-Эрдэнийн хэлж ярьж буйгаас ойлгогдохоор болсон. Нэг талаас Рио-Тинто компани удирдлагын өөрчлөлт нэрээр цаг хожиж буй бол, нөгөө талаас Монголын Засгийн газар гадаадын өндөр мэргэжлийн экспорт, хуульчид шинжээчдийг урьж, багаа хүчирхэгжүүлэх арга замыг бодсон байна. Яг үнэндээ Оюу-толгойн асуудлаар өнөөг хүртэл ямар ч ахиц гарсангүй. “Оюутолгой” компанийн 66 хувийг эзэмшигч “Туркойз хилл” рүү албан бичиг явуулсан, Оюутолгойн хэлэлцээ үргэлжилж байна гэснээс өөр зүйлийг " spokesman" Оюун-Эрдэнэ хэлж чадахгүй байна. Ингэж сүржигнэн, хоосон тайлбар хийж суусаар байтал, Оюу-толгой компани Монголын баялгийг минут тутамд зөөсөөр , монголчууд хөөсөн хөндий нүхтэй л үлдэх нь. Тайлбар хийж байх цаг биш. Тооцоо хийх цаг нь болсон.
Ц. ЭНХБАТ
