Монгол улсад дотооддоо анх батлагдсан тохиолдол гарснаас хойш УОК тав хоногийн хөл хорио тогтоосон. Гэвч батлагдсан тохиолдлууд нэмэгдсээр байгаа тул хөл хориог сунгах шаардлага гарч болзошгүй байгааг албаныхан ийн хэлж буй.
Эрдэмтэн судлаачид Хөл хорио тогтоосон хугацааг 14 хоногоор сунгах зайлшгүй шаардлагатай гэдэг дээр санал нэгдэв. Учир нь одоо явагдаж буй тандалт судалгааны ажлыг дуусгах, цаашид тохиолдлын дам халдваруудыг тогтоох, шинжилгээнд хамруулах ажлуудыг өргөн хүрээнд хийх шаардлагатай гэв.
Мөн хүн амын дунд санамсаргүй түүврийн аргаар 4000-5000 хүнд шинжилгээ хийхээр төлөвлөж буйг хэлэлцэв. Ийнхүү Улсын онцгой комиссын хурлаар оруулж шийдвэрлүүлэхээр болжээ.
Хуралдаанд Эрүүл мэндийн сайд Т.Мөнхсайхан, ЭМЯ-ны Төрийн нарийн бичгийн дарга Я.Амаржаргал, ХӨСҮТ-ийн Тандалт судалгааны албаны дарга А.Амбасэлмаа, ШУА-ийн гишүүн, академич, АШУ-ны доктор П.Нямдаваа, АУ-ны доктор, тархвар судлалын зэрэгтэй эмч З.Адьяасүрэн, АУ-ны доктор, дэд профессор М.Алтанхүү, ЭМЯ-ны дэргэдэх ХӨТС-ын салбар зөвлөлийн дарга Г.Сүрэнханд нар оролцов.
