Монголын ард түмнийг Монголын төрийн үйлчилгээ жигшээсэн. Монгол хүнийг хөсөр хаясан. Монгол яс жаяг, уламжлал, соёлоо уландаа гишгэсэн. Монголын төр Монголын ард түмнийг энэрэн хайрлагч, өмгөөлөн хамгаалагч биш болсон. Энэ бүхний бодит жишээ бол идэр есийн дүн хүйтэнд нүцгэн, нойтон эмнэлгээс туугдан гарсан, дөнгөж төрсөн ядарсан эмэгтэй юм. Монголд хүний амь хулганын аминаас ч хямдхан болжээ. Эмнэлгийн ажилтнууд ч ёс зүй, хүн чанар, хүнлэг сэтгэлээ гээсэн болохыг харлаа. Үүнд ард иргэд жигшин дургүйцлээ. Ард түмэн бол номхон хонь биш, догшин далай тэнгис гэдгийг л Засгийн газарт мэдрүүллээ. Засгийн газар хулчийлаа. Тэд алдаагаа засах биш, ард иргэдийнхээ төлөө ажиллах биш, зүгээр л зугтацгаалаа. Эдийн засаг хүндэрсэн, удахгүй сонгууль болох гэж буйг тооцсон улс төрийн нүүдлийг Хүрэлсүх хийлээ. Тэр жагсаал цуглааныг ашиглан Засгийн газар огцорч буй нэрээр Монгол улсын ерөнхийлөгчид нэр дэвших анхны нүүдлээ хийлээ. Мөн өрсөлдөгчөө намнах ажлаа ч давхар эхлүүллээ. Тэр маш хурдан Засгийн Газраа огцрууллаа. Түүний хэлсэн үгийг бүрэн эхээр нь хүргэе.