Eрөнхий сайдын ажлаа сайн дураараа өгөх болсон У.Хүрэлсүх өөртөө маш их итгэлтэй байна. Тэр улс төрийн дараагийн сэлгээгээ тодоор харж байна. Өөрийгээ тангараг өргөсөн офицер хүн гэж байнга тодотгох дуртай Хүрэлсүх Монгол Улсын ерөнхий командлагч болохоор мориндоо мордон, эмээл суудлаа засан, жолоогоо таарууллаа. " Ёс зүйт төр удирдагч байх шинэ соёл улс төрд бий болж, алдаагаа хэн нэгэн рүү чихээд өөрөө сугарч үлдэх ёсгүй гэж үзээд хариуцлагыг хамтдаа үүрэх ёсны дагуу Ерөнхий сайдын албан тушаалаас огцорч байна" гэж тэр огцорч байгаа гэж шалтгаанаа тайлбарласан. Энэ тайлбарт үнэний ор бий ч, түүнээс өөр шалтгаан үүний ард нуугдаж байна гэж үзэх үндэслэл бий. Тэр Монгол улсын ерөнхийлөгчид нэгэнт нэр дэвших шийдвэр гаргасан нь түүний сайн дураараа огцрох гол шалтгаан болсон гэж Control.mn үзэж байна. Тэр ерөнхий сайдын үүрэгт ажлаа өгөхдөө ерөнхийлөгчийн сонгуулийн сурталчилгаагаа эхлүүллээ. - Миний итгэж найдаж явсан Монгол улсын ерөнхийлөгч Х.Баттулга ард түмнийг үймээнд турхирч, жагсаалыг улс төржүүлсэнд итгэл алдарлаа. Цаашид ч зохион байгуулалттай жагсаал үймээн хийж ерөнхийлөгч, ЗГ гэсэн хоёр институцийн дунд зүй бус самуун үүсч монгол хүний амь насанд эрсдэл үүсэх вий. "Долдугаар сарын 1" давтагдах вий гэж болгоомжилж байна. Монголын ард түмний эв нэгдлийг илэрхийлэгч Ерөнхийлөгч сонгуулийн төлөө ийм зүйл хийж буйд хариуцлага тооцох ёстой. Улс орноо бодож би үүрэгт ажлаасаа чөлөөлөгдөж байна.
Цаашид ажил хийх боломжгүй боллоо. Гэхдээ би улс төрөөс бүр мөсөн явахгүй. Урьдын адил шударга ёсыг алдагдуулж. АТГ, хууль шүүхээр гэсгээн өрсөлдөгчөө намнадаг, хууль шүүхийн удирдлагуудын өргөдлийг түрүүлж бичүүлж авдаг төрийн тэргүүн байж болохгүй гэж үзэж байна. Гишүүний байр суурьнаас олон асуудлыг илчилж тэмцэнэ" гэж ерөнхий сайдын суудлаасаа хэлсэн үгийнхээ үзүүрийг Баттулга ерөнхийлөгч рүү чиглүүллээ. 2020 оны төгсгөлд ААН, айл өрхийн дулаан, цахилгаан, усны төлбөрийг тэглэх Засгийн газар онцгой шийдвэрийг Ерөнхий сайд Хүрэлсүхийн тэргүүлсэн Засгийн Газар гаргасан. Хамгийн ноцтой нь, дээрх төлбөрийг 2021 оны долдугаар сарын 01 хүртэл тэглэнэ гэж заасан нь цаанаа л улс төрийн, сонгуулийн үнэр ханхалж буй. Ийнхүү У.Хүрэлсүх огцрох биш, ерөнхийлөгчид нэр дэвших албан бус нээлтийн ажиллагаагаа эхлүүллээ. Өнөөдрийн байдлаар У.Хүрэлсүхийн гол өрсөлдөгч нь яах аргагүй үйл ажиллагаагаа үргэлжлүүлж буй Монгол улсын ерөнхийлөгч Баттулга юм. Энэ хэлсэн үгнээс, тун удахгүй Х.Баттулгыг хууль хяналтын байгууллага шалгаж, Баттулгыг ерөнхийлөгч болохтой хамт хаагдсан Төмөр замын далангийн барилга, бүтээн байгуулалтын санхүүжилттэй холбоо бүхий хавтаст хэргийг дахин нээх бололтой.
