Ардчилсан Нам дотроо бужигнасан нь МАН-ын олз болсон. Энэ янзаар нь үргэлжлүүлж ерөнхийлөгчийн сонгуультай золгуулчих ч бодол санааг МАН-ын удирдлага тээж буй. Тиймээс ч Туваан, Эрдэнэ нарын мөргөлдөөнийг гаднаас нь хөөрөгдөж буй. Харин энэ бүхнийг АН-ын шударга гишүүд зүгээр хараад сууж, цаг алдаж болохгүй гэж үзлээ. Тухайлбал АН-ын гишүүн хуульч Х.Тэмүүжин: - Ардчилсан Нам өөрийн толгой дээрх бухлыг олж харахаас гадна тэр бухлаасаа яаж салах вэ? гэж санаа зовж байна. Айл гэр хэрүүлтэй байхад олон түмэн тэр айл рүү ойртох нь байтугай үр хүүхэд нь айж ичдэг. АН-ын өнөөгийн байдал хэрүүл, зодоон нь тасардаггүй айлтай л төстэй байна. Тиймээс тогоон доторх асуудлаа шийдэж байж сөрөг хүчнийхээ хяналтыг тогтооно. Нам дотроо хүлээцтэй байж, асуудлаа шийдэн, гадна талдаа хариуцлагатай байх ёстой. АН эрүүл саруул хяналт тавихын тулд Үндэсний бодлогын хорооны ээлжит бус хурлыг яаралтай хуралдуулах шаардлагатай гэж хэллээ. Түүний байр суурийг АН-ын ерөнхий нарийн бичгийн дарга Ц.Баатархүү тэргүүтэй журмын нөхөд нь дэмжлээ. Тэд удахгүй ҮБХ-ны хурлыг зохион байгуулах ажлын хэсгийг байгуулж, хурлаа байгуулах тухайгаа мэдэгдлээ.