Куба улсад ням гарагт болсон жагсаалын үеэр нэг хүн амиа алдаж, цагдаагийн хэд хэдэн ажилтан гэмтэж бэртсэн тухай тус улсын Коммунист намын “Granma” сонин мэдээлжээ.
“Мөргөлдөөний үеэр хэд хэдэн иргэнийг саатуулж, хууль сахиулах байгууллагын зарим ажилтан гэмтэж бэртсэн. Үймээн дэгдээгчдийн нэг болох 36 настай иргэн Диубис Лауренсио Техеда амиа алдав. Тэрбээр өмнө нь хулгай, танхайн хэргээр ял шийтгүүлж байсан энэ хотын оршин суугч юм" гэж тус сонинд онцолсон байна.
Сонинд мэдээлснээр, нийслэл Хавана хотоос зүүн өмнө зүгт орших Арройо-Наранхо хотод цагдаа нар, одоогийн засгийн газрыг эсэргүүцэгчид болон дэмжигчдийн хооронд мөргөлдөөн болжээ.
Эмх замбараагүй байдал дэгдээгчдийг хотын цагдаагийн газар луу явж байхад нь саатуулжээ. Тэд хууль сахиулах байгууллагын ажилтнууд болон тайван жагсагчид руу чулуу, мод, хутгатай дайрсан байна. Түүнчлэн байшингуудыг эвдэн сүйтгэж, чингэлэг галдан шатааж, цахилгаан дамжуулах шугамуудыг гэмтээсэн гэж "Granma” сонинд мэдээлжээ.
Ням гарагт Кубын олон арван хотод томоохон хэмжээний эсэргүүцлийн жагсаал болсон юм. Жагсаалыг авсан дүрс бичлэгээс үзэхэд түүнд олон мянган хүн оролцжээ. Жагсагчид “чөлөөт сонгууль явуулах”, нийгмийн асуудлыг шийдвэрлэх зэрэг шаардлагуудыг тавьж байв.
Кубын Ерөнхийлөгчийг гудамжинд гарч, өдөөн хатгалгыг эсэргүүцэхийг уриалсны дараа Засгийн газрыг дэмжигчид, коммунистууд мөн жагсаал хийжээ.
Эх сурвалж: МЕХИКО. /RIA Novosti/
