Афганистаны нийслэл Кабул хотын олон улсын нисэх буудалд пүрэв гарагт үйлдсэн дэлбэрэлтүүдийг Их Британийн Ерөнхий сайд Борис Жонсон “зэрлэг балмад” хэмээн шүүмжилжээ.
Тийнхүү Б.Жонсон АНУ, Афганистаны ард түмэнд гүнээ эмгэнэл илэрхийлэхийн сацуу олон иргэн амь насаа алдсан явдалд харамсаж буйгаа илэрхийлсэн байна. Мөн Их Британи Афганистанаас нүүлгэн шилжүүлэх ажиллагаагаа үргэлжлүүлнэ гэдгийг мэдэгджээ.
Саудын Арабын Гадаад хэргийн яам “Twitter” хуудсаараа дамжуулан хийсэн мэдэгдэлдээ, Кабулын нисэх буудалд болсон халдлагыг эрс зэмлэн буруушааж буйгаа онцлон тэмдэглээд, ийм үйлдэл нь шашны зарчмууд, хүн төрөлхтний үнэ цэнтэй зөрчилдөж буйг мэдэгдсэн байна.
Мөн Энэтхэгийн Гадаад хэргийн яам Кабулд болсон дэлбэрэлтийг зэмлэн буруушаагаад, “Дэлхий дахин терроризм болон террористуудыг хоргодох газраар хангаж буй хүмүүсийн эсрэг хүчээ нэгтгэх хэрэгтэй гэдгийг өнөөдрийн халдлагууд харууллаа” хэмээн мэдэгджээ.
Үүний зэрэгцээ НҮБ-ын Ерөнхий нарийн бичгийн дарга Антонио Гутерреш “Кабулд болсон аймшигт террорист халдлагыг бүх нийтээрээ эрс зэмлэн буруушааж буйг” мэдэгдээд, амиа алдсан хүмүүсийн ар гэрийнхэнд гүнээ эмгэнэл илэрхийлсэн байна.
Эх сурвалж: КАБУЛ. /NHK/
