Шинэ Зеландад баасан гарагт “COVID-19”-ийн “Дельта” хувилбараар халдварласан 70 тохиолдол шинээр илэрснээр дотоодод бүртгэгдсэн ийм тохиолдлын тоо 347-д хүрчээ.
“Дельта” хувилбараар халдварласан шинэ тохиолдлууд бүгд хамгийн том хот болох Оклендэд илэрчээ. Ингэснээр Оклендэд илэрсэн нийт тохиолдлын тоо 333-т хүрсэн бол нийслэл Веллингтонд 14 тохиолдол бүртгэгдээд байна.
Эрүүл мэндийн яамны мэдээлснээр, халдвараас урьдчилан сэргийлэх, хяналтад авах хатуу журмыг чанд баримтлан бүх тохиолдлыг тусгаарлах байр луу шилжүүлжээ.
Эпидемиологийн хувьд халдварын тохиолдлуудын 278 нь өөр хоорондоо холбоотой болох нь тодорхой байгаа бол үлдсэн 69 тохиолдол хэрхэн халдварласныг хараахан тогтоогоогүй байна гэж уг мэдэгдэлд дурдсан байна.
Мөн эмнэлэгт хэвтэн эмчлүүлж буй 19 хүний биеийн байдал, эрчимт эмчилгээний тасагт эмчлүүлж буй нэг хүний биеийн байдал тогтвортой байгааг мэдээлжээ.
Баасан гарагт хилийн чанадаас ирсэн хүмүүсийн дунд халдварын шинэ тохиолдол бүртгэгдээгүй байна.
Цар тахал дэгдсэнээс хойш Шинэ Зеландад халдварын нийт 2941 тохиолдол илэрчээ.
Эх сурвалж: ВЕЛЛИНГТОН. /Xinhua/
