АНУ-д коронавирусийн халдварын улмаас нас барсан хүний тоо орон нутгийн цагаар баасан гаргийн оройны байдлаар 700 мянга давсныг Жонс Хопкинсын нэрэмжит их сургуулийн тоо мэдээлэл харууллаа.
Цар тахал дэгдсэнээс хойш тус улсын хэмжээнд “COVID-19” халдварын 43.6 сая тохиолдол илэрч, 700 258 хүн нас баржээ.
Түүнээс Калифорни муж улсад хамгийн олон буюу 69 225 хүн, Техаст 65 529 хүн, Нью-Йоркт 55 416 хүн, Флоридад 55 299 хүн нас барсан байна. Мөн Пенсильвани, Иллинойс, Нью-Жерси, Жоржиа, Мичиган, Охайо муж улсад 22 мянга гаруй хүн халдварын улмаас нас баржээ.
“COVID-19” халдварын үзүүлэлтүүдээрээ дэлхийн улс орнуудаас нэгдүгээрт бичигдсэн хэвээр байгаа АНУ-д дэлхий даяар илэрсэн халдварын нийт тохиолдлын 18 гаруй хувь, нас барсан тохиолдлын 15 орчим хувь нь бүртгэгдсэн байна.
АНУ-д халдвараар нас барсан тохиолдлын тоо энэ оны хоёрдугаар сарын 22-нд 500 мянгад, зургаадугаар сарын 15-нд 600 мянгад хүрчээ. Тодруулбал, 500-гаас 600 мянгад хүрэхэд 113 хоног зарцуулсан бол ийнхүү 108 хоногт 600-гаас 700 мянгад хүрсэн байна.
Эх сурвалж: ВАШИНГТОН. /CBS/
