-Монгол улсын Засгийн газар болон “РиоТинто” нар бол хамтрагчид. Тиймээс бид Монгол эх оронд минь болж байгаа зүйлс, илэрхийлж байгаа байр суурь, дуу хоолойг сонсож ажиллах зайлшгүй шаардлагатай. Энэ утгаараа би хөндөгдөж байгаа асуудлуудыг шийдвэрлэхийн тулд эх орон, ажиллаж байгаа компани хоорондоо нэгдмэл байр сууринд хүргэхийн тулд хичээн ажиллаж байна. Үүнд мэдээж хугацаа орно, гэвч хамгийн чухал нь бид сайтар сонсож, хүндэтгэлтэй хандан ажиллах ёстой гэж 2021 оны аравдугаар сарын 20-ны өдөр , Рио Тинто” группээс хөрөнгө оруулагчдадаа зориулан жил бүр зохион байгуулдаг семинарын үеэр “Рио Тинто”-гийн Зэсийн группийн Гүйцэтгэх захирал Б.Болд хэлжээ. Тэрбээр Монголын Засгийн Газар болон Рио Тинто компани бол хамтрагчид гэж хэлсэн нь хамгаас анхаарал татлаа. С.Баяр, Ч.Сайханбилэг, Сү.Батболд, Эрдэнэбат, Хүрэлсүх гээд үе үеийн ерөнхий сайд нар тэдний хамтрагчид байж таарлаа. Оюун-Эрдэнэ ч удахгүй хамтрагч болох бололтой. Ийм учраас Монголчууд алдаж, жилээс жилд өр нь нэмэгдэж, баялаг нь нимгэрч буй аж. Рио Тинто компани дэлхий дээрх зэсийн гол тоглогч болохоор зүтгэж байна.Тэд зэсийн үйлдвэрлэлээ хоёр дахин нэмж, 1 сая 200 тонн зэс боловсруулах зорилго тавьснаас гуравны нэг буюу 400 сая тонн зэсийг зөвхөн ганц Оюутолгойгоос авахаар төлөвлөж буйгаа ч Лондонд болсон семинарын үеэр Болд дэлгэсэн байна. Тэр Оюутолгойг маш их арвин баялагтай гэж нэг ч үг хэлсэнгүй. Харин Оюутолгойд оруулсан Рио Тинтогийн хөрөнгө оруулалт бол маш том хэмжээнийх гэж Рио Тинтог өргөхөө мартсангүй.
Ц.ЭНХБАТ
