Шатахуун импортлогч 17 компанийн төлөөллийг Уул уурхайн Яамны Шатахууны зөвлөл хүлээн авч, хуралдсан байна. 2019 оны 10 дугаар сараас хойш огт хуралдаагүй тус зөвлөл энэ удаад 3 цаг гаруй хуралдсан ч, тодорхой шийдэл гаргаж чадсангүй өндөрлөлөө. Хурал ирэх долоо хоногийн Даваа гарагт дахин үргэлжлэхээр боллоо. - Бид үнийн асуудлаар хуралдлаа. Дэлхийд шатахууны үнэ тогтвортой өсөж байна. Үнийг барьснаас болж Монголын шатахуун импортлогч компаниуд 1 литр тутамдаа 300 төгрөгний алдагдал хүлээж буй тухайгаа ярилаа. Үнээс гадна хангамж хичнээн чухал болохыг өнгөрсөн сард нийтээрээ мэдэрсэн. Тодорхой хувиар үнийг тухайн үед өсгөсөн. Алдагдал нь хүлээж буй компаниуд хангамж, нөөцөө базаахад хүндрэл учирч буйгаа учирлалаа. Үнийг чөлөөлөх асуудлыг тэд тавьсан. Яамны зүгээс ямар боломж байгааг судлах шаардлагатай учир тодорхой шийдэлд хүрсэнгүй. Ирэх долоо хоногоос хурал энэ сэдвээрээ үргэлжилнэ. Шийд гарвал эхний ээлжинд тодорхой хувиар үнэ нэмэгдэх магадлалтай гэж Уул уурхайн Яамны албан тушаалтан хэвлэлд ярилцлага өглөө.