Монголын хөлбөмбөгийн нэрт зүтгэлтэн Буяннэмэх овогтой Ганболд хорвоогийн мөнх бусыг үзүүлж, Монголын хөлбөмбөгт хүнд гарз тохиолоо. Б.Ганболд нь Монголын хөлбөмбөгийн спортыг хөгжүүлэх их үйлст үнэлж баршгүй хувь нэмэр оруулсан томоохон зүтгэлтэн байлаа. Тэрбээр 1997-2010 онд МХБХ-ны Ерөнхий нарийн бичгийн дарга, 2010 – 2014 онд МХБХ-ны Ерөнхийлөгчөөр тус тус ажиллахдаа Монголын Хөлбөмбөгийн хөгжлийг шинэ шатанд дэвшүүлж, Ази, Дэлхийтэй холбон хөгжүүлэх эхлэлийг тавьсан юм. Монголын хөлбөмбөгчдөөс анх удаа Азийн Хөлбөмбөгийн Холбооны гүйцэтгэх хорооны гишүүн, ОУХБХ- ны хөгжлийн хорооны гишүүн зэрэг олон улсын сонгуульт албанд сонгогдсон нь тив, дэлхийн хөлбөмбөгийн ертөнц Монголын Ганболдыг хүлээн зөвшөөрч байсны илэрхийлэл. Түүний удирдлага дор Монголын Хөлбөмбөгийн Холбоо нь 1997 онд Азийн Хөлбөмбөгийн Холбоонд, 1998 онд Олон Улсын Хөлбөмбөгийн Холбоонд, 2002 онд Зүүн Азийн Хөлбөмбөгийн Холбоонд гишүүнээр тус тус элсэн орж, олон улсын албан ёсны тэмцээн уралдаанд оролцох эхлэлийг тавьсан түүхтэй. Түүний нэр нөлөө, олон улсын байгууллагатай зөв ойлголцож байсны үр дүнд ОУХБХ-ны "ГООЛ" зэрэг олон төсөл хөтөлбөр амжилттай хэрэгжиж, ОУХБХ, АХБХ-ны санхүүжилтээр МХБХ-ны ногоон талбай, цэнгэлдэх хүрээлэн, Төв оффисын байр, Футзалын ордон зэрэг ашиглалтанд орсон юм. Ингэж л хөлбөмбөг Монгол улсад жинхэнэ утгаар хөгжих бодит суурийг Ганболд тавьсан. Ганболд МХБХ-ны е.н.б.дарга, ерөнхийлөгчөөр ажиллах хугацаандаа өнөөгийн Монголын Хөлбөмбөгийн Холбооны бүтэц, зохион байгуулалтын анхны суурийг зөв тавьж чадсан алсын хараатай удирдагч байсан юм. Түүнийг залуу насаа хөлбөмбөгийн спортод зориулахдаа хурд хүчний гайхамшиг болсон шилдэг тоглогч байсныг үе үеийн хөлбөмбөгчид, найз нөхөд нь бахархан дурсаж байна. Түүний үйл хэрэг үргэлжид дурсагдана. Ганболдын гэр бүл, үр хүүхэд, төрөл төрөгсдөд гүн эмгэнэл илэрхийлье.
МОНГОЛЫН ХӨЛБӨМБӨГИЙН ХОЛБОО
