Их Британийн Ерөнхий сайд Борис Жонсон ОХУ-ын Ерөнхийлөгч Владимир Путинтэй Украины эргэн тойрон дахь нөхцөл байдлын талаар шинэ яриа хэлэлцээ хийхэд бэлэн байгаагаа мэдэгдэв.
"Оросын зорилго бол НАТО-г хилээсээ хол байлгах явдал юм. Хэрэв тийм бол Украин руу довтлохоос илүү сөрөг үр дагавартай зүйлийг төсөөлөхөд бэрх. Миний эрхэм найзууд болох Их Британийн Гадаад хэргийн сайд, Их Британийн Батлан хамгаалахын сайд нар холбогдох санааг Ерөнхийлөгч Путинд уламжилсан, би мэдээж түүнтэй дахин ярилцахад бэлэн байна” гэж Б.Жонсон мягмар гарагт парламентдаа үг хэлэхдээ мэдэгдээд 12 дугаар сарын 13-нд В.Путинтэй утсаар ярьсан болохоо сануулжээ. "Би Ерөнхийлөгч Путинтэй ярилцахдаа түүхийн эгзэгтэй мөчид Британи, Орос хоёр хамтдаа зогсож байсныг сануулсан. Манай улсууд НҮБ-ын Аюулгүйн Зөвлөлийн байнгын гишүүн болсон цорын ганц шалтгаан нь фашизмын эсрэг мөр зэрэгцэн тэмцсэн дайчдын маань баатарлаг үйлс юм. Оросын бүх санаа зовоосон асуудлуудыг арилгаж, бид хатуу зарчимтай дипломат замаар хамтын аюулгүй байдалд хүрэх арга замыг олж чадна гэдэгт би итгэлтэй байна" гэж Их Британийн Засгийн газрын тэргүүн хэлсэн байна.
Энэ нь зөвхөн Украинд халдаагүй тохиолдолд л боломжтой гэдгийг Б.Жонсон анхааруулжээ. Тэрбээр хэлэхдээ, Их Британи ОХУ-ыг чиглэсэн бодлогоо хэрэгжүүлэхдээ "дипломат ба тогтоон барих" бодлогыг хослуулахыг хичээж байгаа ч Украинд халдан довтолсон тохиолдолд "ОХУ-ын эсрэг хатуу хориг арга хэмжээ авахаас буцахгүй" гэв.
Эх сурвалж: ЛОНДОН. /RT/.
