Монгол улсын ерөнхийлөгч бухимдлаа. Бөхчүүд барилдалгүй, үзэгчдээ үл хүндэтгэн, өөр хоорондоо хэрэлдэж, товлосон барилдааныг цуцалсанд тэр хилэгнэлээ. Энэ бол ерөнхийлөгчөөр дамжин илэрсэн монголчуудын хилэгнэл байлаа. Тэр Бөхийн холбооны удирдлагыг дуудаж, бөхчүүдээ удирд, чадахгүй бол төр оролцоно гэдгээ дуулгалаа. Өгч болсон цолыг бас хурааж болно ч гэж мэдэгдлээ. Мөн Үндэсний их баяр наадмын тухай хуулийн нэмэлт, өөрчлөлтөд үндэсний бөхийн маргаантай асуудлыг хэрхэн шийдвэрлэх талаар тусгах, ард түмнээ үл хүндэтгэдэг, ёс суртахуунгүй бөхчүүдийн цолыг хураах хүртэл арга хэмжээ авдаг болгох нь зөв юм байна гэдэг байр сууриа илэрхийллээ. Бөхчүүд Цагаан сараар хэрэлдэж маргалдах, барилдааныг цуцлах тохиолдолд хатуу арга хэмжээ авахаа Бөхийн холбооны удирдлагуудад анхаарууллаа.
