АНУ -ын CNN агентлаг болон түүний холбоотон Английн ВВС телевиз Украйнаас цаг тутам мэдээлэл цацаж байна. - АНУ 25 жил дайтахдаа 2500 цэргээ л алдаж, асар их хохирол амссан. Харин Орос улс Украйны эсрэг өдөөсөн дайны эхний 10 хоногт л түүнээс 2 дахин буюу 5000 цэргээ алууллаа. Өчнөөн танк нь устсан. Цэргүүд нь мянга мянгаараа бууж өгч байна . Оросын арми чадвар муутай, техник нь хоцрогджээ гэж мэдээлж байна. Мөн Орос улс цэргийн хүчээ Алс Дорнодоос баруун хил рүүгээ зузаатгаж байна гэж нэмж мэдээллээ. Энэ янзаараа бол Украйн-Оросын дайн сунжрах төлөвтэй. Хамгийн гол нь Украйн-Оросын дайны зэрэгцээ АНУ-Оросын "мэдээллийн дайн" давхар өрнөж байна. Энэ дайнд Оросын тал илэрхий ялагдаж буй учир Орос улсын ерөнхий командлагч В.Путин хөрш зэргэлдээ орнуудад хандаж мэдэгдэл гаргалаа.Үүнд: - ОХУ хөрш зэргэлдээ орнуудынхаа талаар дотроо ямар нэгэн далд санаа агуулсан бодлогыг нууж, тээж явдаггүй. Бид хэнийг ч түрэмгийлэн эзлэх, эрхшээлдээ оруулахад чиглэгдсэн бодлого явуулдаггүй. Тийм харалган бодлого ч явуулах шаардлага ОХУ-д байхгүй юм !!! Украйнд болж буй арга хэмжээ бол Орос улсын эсрэг онилсон аюул заналыг зайлуулах, ард иргэдийнхээ аюулгүй байдлыг хангахын төлөө аргагүй хийж буй цэргийн арга хэмжээ мөн. АНУ болон Өрнөдийнхөн хэвлэл мэдээллээр дамжуулан бусдыг ОХУ-ын эсрэг турхирч, элдэв гүтгэлэг, доромжлол, дээр нь балмад үйл ажиллагааг явуулж байна. Тиймээс дээрх турхиралтанд үл автаж, бидний хоорондын харьцаанд сэв суулгаж болзошгүй аливаа алхмуудаас татгалзаж, улс хоорондын уламжлалт найрсаг харилцаагаа хэвийн төвшинд хойшдоо ч үргэлжлүүлэн явуулахыг уриалья. Барууныхан түүхэнд, урьд өмнө байгаагүй, хожид ч байж боломгүй эдийн засгийн хориг арга хэмжээг Оросын эсрэг тавьж байна. Тэглээ ч ОХУ-ыг сөхрүүлж чадахгүй. Хөрш зэргэлдээ орнуудтай урд өмнө тохиролцож хэрэгжүүлж ирсэн эдийн засгийн хоорондын харилцаанд сөргөөр нөлөөлж чадахгүй. ОХУ хэзээд хөрш зэргэлдээ орнуудтайгаа найрсаг харилцаатай байсан. Улс төр болон эдийн засгийн төсөл, гэрээ хэлэлцээрүүд цаг хугацаандаа хэрэгжиж, хэвийн үргэлжлэх болно. Ингэж Путин хөрш орнуудад хандаж хэлсэн үгэндээ онцоллоо. Өөрөөр хэлбэл Монголчуудыг ч АНУ болон Өрнөдийнхний суртал ухуулга, турхиралтанд бүү авт. Тэгэж чадвал Гусинский Озеро-гоос Монгол улсын Эрдэнэт үйлдвэрийг эрчим хүчээр хангах, Монголчуудыг түлшээр хангахаа хэвээр үргэлжлүүлнэ гэх дохиог өглөө. Монгол улс түлш шатахуунаар ОХУ-аас 90 хувь хамааралтай хэвээр. Түлш тасарвал Монгол улсын эдийн засаг тэр чигтээ зогсох аюул нөмөрнө. Бодож үзэх л асуудал.
Ц. ЭНХБАТ
