Монголын Үндэсний Морин Уралдаан, Уяачдын холбооноос "Монгол наадам-Монгол адуу" тайван жагсаал, цуглааныг зохион байгуулж байна. - Үндэсний их баяр наадмын морин уралдаанд уралдах морьдыг сэрвээний өндрөөр хэмжих шийдвэр нь буруу юм. Улс хувьсгалын түүхэн 100 жилийн ойн наадмыг эрлийз морьдод найр тавьж захиалгат шийдвэр. Үүний ард хэсэг бүлэг мөнгөтэй улсууд зогсож байна. УИХ-ын гишүүн Т.Аюурсайхан 20 гаруй мянган ам.доллараар эрлийз адуу худалдаж авсан. ХЗДХ-ийн сайд Х.Нямбаатар эрлийз адуу уядаг. Зөвхөн эрлийз адуугаар цол авсан Дорнод аймгийн Батзориг уяач ХЗДХ-ийн сайд Х.Нямбаатарын морийг уяахаар тохирсон гэх зэрэг мэдээлэл дуулдаж байна. Эрлийз болон монгол морьдыг тусад нь уралдуулъя гэхээр хууль, журмаар " хулгай" хийж, монгол морьдын наадмыг ч булаахаар санаархаж байх юм. Монгол улсын Ерөнхийлөгчийн Тамгын газрын дарга Цогтбаатар гэхэд л Эрлийз Морьдын Уяачдын холбоог төлөөлдөг. Тиймээс сэрвээгээр нь хэмжиж уралдуулна гэдэг бол Монгол морио хавчих бодлого. Малчид нь монгол азарганд гүү гишгүүлэхээс татгалзаж, төр нь Монгол морьдоо хавчиж, эрлийз морьдыг дэмжсэн бодлогыг эсэргүүцэж байна гэж тус тайван жагсаалыг удирдаж буй Монголын Үндэсний морин уяачдын холбооны Ерөнхийлөгч Тод манлай уяач Ц.Дуламсүрэн хэллээ.
Б.Пүрэвдорж
