Ковидын хоёр жил амаргүй туссан. Олон үйлдвэр, дэлгүүр хаалгаа барьсан. Энэ бүхнийг АНУ -ын Цагаан Ордон нүдээ аньж, чихээ бөглөж суугаагүй байна. Өмнө нь үйлчилгээ эрхэлж байсан ресторан, үйлчилгээний газруудыг бодлогоор дэмжсэн байна. - Урсгал зардал, түрээс, ажилчдын цалин, дээрээс нь мөнгөн дэмжлэгийг АНУ-ын төсвөөс гаргаж, жижиг дунд үйлдвэрлэлийг дампуурлаас аварсан. Харин дөнгөж үйлчилгээ эрхэлж байсан ресторан үйлчилгээний газрууд тэр бодлогод хамрагдаж чадаагүй . Учир нь өмнөх жилийн санхүүгийн тайланг үндэслэж санхүүжилт олгох журмыг баталсан учир тухайн үед дөнгөж нээгдсэн ресторанууд тэрхүү дэмжлэгийн гадна үлдсэн гэж АНУ-ын томоохон санхүүгийн компанид ажилладаг монгол бүсгүй Нямхоролын Өнөрөөгөөс сонслоо. Үүнийг Kazoku рестораны монгол эзнээс лавлавал: - Манайх дөнгөж нээсэн байсан тул тэр дэмжлэгэд хамрагдаагүй. Хөөцөлдөж үзсэн ч өмнөх жилийн санхүүгийн тайлан тооцоо бидэнд байгаагүй . Энэ гол шалтгаан болсон. Бодохноо, аргагүй байх. АНУ бол хууль дүрэм, гаргасан журмаа ягштал биелүүлдэг. Гэхдээ биднийг жирийн иргэд нь дэмжсэн. АНУ-ын дээрхи шийдвэрийг өрөөсгөл байна гэж үзсэн иргэд Ричмондын газар нутаг дахь дөнгөж нээгдсэн ресторануудыг хохироож болохгүй гэж зөвшилцсөн байна лээ. Цөөхүүлээ ч гэсэн ресторанд хооллож, гэрээр хүргэлтийн хоол авч бизнесийг нь тасалдуулахгүй дэмжие гэж зүтгэсэн тэдгээр иргэдийн хүчинд ресторан маань дампууралгүй үлдсэн гэж Kazoku сушины рестораны эзэн Энхням тайлбарлалаа. Монголчуудын нээсэн энэхүү ресторан нь оршин суугчдын дунд явуулсан санал асуулгаар "Шилдэг япон хоол"-той ресторанаар шалгарсан байна.
Ц.ЭНХБАТ(АНУ, Ричмонд муж)