Дурсамж Монголын уран зохиолын нэгэн сайхан уул нуржээ. Хавар ярилцлага хийж сониндоо гаргахад, бас номоо хэвлүүлсний дараа утасдан баяр хүргэж, урам хайрлаж асан сайхан буурал тэнгэртээ хальж. Бүтэн жаран илүү хугацаанд Монголын зохиолчдын эвлэлийн гал голомтыг сахиж, "Утга зохиол, урлаг" сонин, "Цог" сэтгүүлийг эмхлэн гаргалцаж, "Монгол роман" цувралыг эрхлэн хэвлүүлж, туурвин бүтээхийн зэрэгцээ зохиолчдынхоо өв, намтар түүхийг судлан ботилж, "Хонины найр", "Гул Аранжин" тэргүүт кино, олон арван жүжгээ тайз, дэлгэцнээ амилуулсан жүжиг, киноны нэрт зохиолч Хорлоогийн Зандраабайдий ах минь дүрст лагшныг хураан, номын агаарт шингэж. Зохиолч нөхдийнхөө дурсгалд өргөн барьсан номын суварга "Бадмаарсан зул"-ыг нь эрхэм хүмүүнд өөрт нь мандаан дурсгалыг нь хүндэтгэн мэхийе. Д.Намдаг, Ч.Чимид хоёрын шавь, Л.Түдэвийн цэрэг явсан гэдгээрээ бахархаж, тэднийгээ дурсаж, Д.Сэнгээ, Н.Нямдорж, С.Дашдооров нарын алтан үеийнхний тухай өрнүүн сайхан хууч дэлгэж, эх хэл, утга соёл, монгол бичгийнхээ талаар санаа бодлоо хуваалцаж суусан нь захиас, сургамж болон зүрх сэтгэлд хадгалагдаж үлдэв. Сайн төрлийг саадгүй олж, дээд тэнгэрийн орноо төрөх болтугай гэж Сонинбаяр Ганболд постолжээ.
Ум Ма Ни Бад Мэ Хум
