Оросын хамгийн нөлөө бүхий урлагийн зүтгэлтэн, дуучин А.Пугачёва өөрийн инстаграмдаа ингэж ууртай нь аргагүй бичлээ. Оросын эстрадын урлаг, Телевиз, Радиог дуу, хөгжмөөр дамжуулан гартаа " оруулсан" А.Пугачёва анх удаа Путины эсрэг дуу хоолойгоо нэгтгэлээ. - Миний нөхөр эх оронч сэтгэлтэй, өндөр ёс суртахуунтай, улс орныхоо гэрэлт ирээдүйн төлөө өөрийгөө зориулсан шударга хүн. Тэр бол авилгач биш.Жирийн орос эцэг эхийн олон зуун мянган хөвгүүд ямар ч утгагүй дайнд амь алдахыг тэвчээгүй. Тэр энх тайван, эрүүл ухаанд итгэсэн. Би эрүүл саруул ухаантай нөхрөө дэмжиж, түүний талд зогсох болно. Нөхрийг минь гадаадын туршуул гэж үзсэн. Тиймээс намайг ч гэсэн гадаадын туршуул гэсэн жагсаалтандаа оруулж өгөхийг хүсье гэж 250 сая пянз борлуулсан, урлагт 55 жил тасралтгүй зүтгэсэн, өдгөө 73 настай А.Пугачёва байр сууриа хатуухан илэрхийллээ. Тэрбээр ОХУ-д хэнээс айхгүй нэгэн. Түүнийг хэн ч баривчилж зүрхлэхгүйг ч мэднэ. Улс төрчид бол цаг зуурын хүмүүс, Алла бол мөнхийн гэдгээ мэдэрсэн. Тэрбээр хамгийн сүүлд Горбачёвын оршуулганд оролцож, нийтэд ил гарсан. Одоогоор түүний мэдэгдлийн хариуд Оросын эрх баригчид юу ч дуугарч чадаагүй байна.
Ц. ЭНХБАТ ( Эх сурвалж: Английн Гиурдан сонин)
