АНУ-ын завсрын сонгуульд Ардчилсан намынхан урьдчилан төсөөлж байснаас олон санал авсныг урьдчилан дүнгүүд харуулж байгаа ч хэд хэдэн гол муж улсуудад саналын хуудасны тооллого үргэлжилж байгаа тул Конгресст аль нам хяналтаа тогтоох нь одоогоор тодорхойгүй байна.
Энэхүү сонгуулийн үр дүн Ерөнхийлөгч Жо Байден бүрэн эрхийн хугацааныхаа хоёрдугаар хагаст ямар үйл хэргийг гүйцэлдүүлж чадахыг шийдвэрлэх ач холбогдолтой юм.
Сенатын танхимд аль нам хяналтаа тогтоох нь Аризона, Невада, Жоржиа гэсэн гурван муж улсын сонгуулийн дүнгээр ерөнхийдөө шийдвэрлэгдэнэ. Одоогоор Аризона, Невадагийн сонгуулийн дүнг урьдчилан таамаглахад хэтэрхий эрт байгаа бол Жоржиад ирэх сард хоёрдугаар шатны санал хураалт явуулахаар болоод байна.
Харин 435 гишүүнтэй Төлөөлөгчдийн танхимд Бүгд найрамдах намынхан урьдчилан төсөөлж байснаас цөөн суудалтай хэдий ч хяналтаа тогтоох төлөвтэй байна.
Эх сурвалж: ВАШИНГТОН. /DW/
