Хятадын зүүн нутгийн Фүжянь мужийн Шэмянь хотын дунд шатны Ардын шүүхээс авлига авсан хэрэгт сэжиглэгдэж буй Шанхай хотын Ерөнхий прокурор асан Жан Бэньцайд эрүүгийн хэрэг үүсгэжээ.
Ерөнхий прокурор асанд намын дотоод мөрдөн шалгалтыг холбогдох хяналт шалгалтын байгууллагууд өнгөрсөн оны зургаадугаар сард эхлүүлсэн байна. Харин есдүгээр сард түүнийг Хятадын Коммунист намаас хөөж, төрийн албанаас халсан бөгөөд 11 дүгээр сард баривчилжээ. Жан Бэньцай нь албан тушаалын байдлаа урвуулан ашиглаж, хувьдаа хөрөнгөжсөн, бизнестэй холбоотой янз бүрийн асуудлыг шийдвэрлэх, тодорхой төслүүдийг хэрэгжүүлэхэд дэмжлэг үзүүлэхэд гуравдагч этгээдээс их хэмжээний авлига авч байсан нь мөрдөн шалгалтын явцад тогтоогджээ.
Энэ нь Шанхай хотын шүүхийн тогтолцоо, Прокурорын газар дахь авлигын анхны дуулиан биш юм. Өмнө нь 2018 оны 10 дугаар сарын сүүлчээр Шанхай хотын Ерөнхий прокурор асан Чэнь Сюй хээл хахууль, авлига авсан хэргээр бүх насаараа хоригдох ял авсан байна.
Хятадад Ши Жиньпин тэргүүтэй тус улсын удирдлагын “тав дахь үе” 2012 онд төрийн эрхэнд гарсны дараа авлигатай тэмцэх кампанит ажлыг эхлүүлсэн билээ. Авлигатай тэмцэх томоохон кампанит ажлын үр дүнд сүүлийн хэдэн жил тус улсад энгийн албан тушаалтан төдийгүй өндөр дээд тушаалтнууд албан тушаалаасаа чөлөөлөгдөж, шоронд хоригдох зарим тохиолдолд бүх насаараа хоригдох ял сонсжээ.
Эх сурвалж: ШАНХАЙ. /Xinhua/.
