Японы автомашин үйлдвэрлэгч “Toyota Motor” компанийн дэлхий даяарх борлуулалт хоёрдугаар сард түүхэн дээд үзүүлэлтэд хүрч, үйлдвэрлэлийнх нь хэмжээ хоёр сар дараалан өссөн үзүүлэлттэй гарчээ.
Гэсэн хэдий ч цар тахлаас үүдэлтэй эд ангийн хомсдол тулгамдсан асуудал хэвээр байгааг компанийн мэдэгдэлд дурдсан байна. Цар тахлын үеэр “Toyota” бусад автомашин үйлдвэрлэгчидтэй харьцуулахад нийлүүлэлтийн сүлжээний асуудлыг сайн зохицуулж чадсан ч 2022 онд сар тутмын үйлдвэрлэлийн зорилтоо нэг бус удаа бууруулсан билээ.
Өнгөрсөн сард Японы автомашин үйлдвэрлэгч хамгийн том компанийн дэлхий даяарх борлуулалт өмнөх оныхоос 10.3 хувиар өсөж, 773 271-д хүрчээ. Үүнд дотоодын борлуулалт 53.2 хувиар өссөн нь голлох нөлөө үзүүлсэн байна. Өмнөх оны мөн үед хагас дамжуулагч хомсдсоны улмаас борлуулалт огцом унаад байсан юм.
“Toyota”-гийн мэдээлснээр, энэ оны хоёрдугаар сард дэлхий даяарх үйлдвэрлэл 2 хувиар өсөж, 755 839-т хүрснээр зорилтот түвшнээс /750 мянга/ давсан байна. Энэ үзүүлэлт нэгдүгээр сард 8.8 хувийн өсөлт үзүүлээд байв. Түүнчлэн нэгдүгээр сард өмнөх оныхтой харьцуулахад 30.1 хувиар өссөн дотоодын үйлдвэрлэл өнгөрсөн сард мөн 11.2 хувиар өсжээ.
Эх сурвалж: ТОКИО. /Reuters/
