АНУ-ын Төрийн нарийн бичгийн дарга Энтони Блинкен, Хятадын Гадаад хэргийн сайд Ван И нар энэ долоо хоногт Вашингтонд хэлэлцээ хийнэ гэж Төрийн департамент мэдээлжээ.
Ван И Вашингтонд энэ долоо хоногт багтаан айлчилж магадгүй гэж Wall Street Journal сонин өмнө нь мэдээлж байсан юм. Тэрбээр Э.Блинкентэй Ази, Номхон далайн эдийн засгийн хамтын ажиллагааны дээд хэмжээний уулзалтад БНХАУ-ын дарга Ши Жиньпин оролцох бэлтгэл ажлын талаар хэлэлцэнэ гэж тус сонинд мэдээлсэн байна. Уг уулзалт ирэх сарын дундуур Сан-Франциско хотод (Калифорни муж улс) болох юм.
“Блинкен Хятадын Коммунист намын Төв хорооны гадаад хэрэг эрхэлсэн хорооны тамгын дарга, Гадаад хэргийн сайд Ван И-г энэ сарын 26-28-ны өдрүүдэд хүлээн авч уулзана. Э.Блинкен, Ван И нар АНУ-Хятадын харилцааг хариуцлагатайгаар удирдан чиглүүлэх, харилцаа холбооны нээлттэй сувгуудыг хадгалах байнгын хүчин чармайлтын хүрээнд хоёр талын, бүс нутгийн болон олон улсын хэд хэдэн асуудлыг хэлэлцэнэ" АНУ-ын Төрийн департаментын мэдэгдэлд дурджээ.
"Бид Америкийн ашиг сонирхол, үнэт зүйлсийг урагшлуулах, санал зөрөлдөөнийг арилгах, олон улсын нийтлэг асуудлуудыг шийдвэрлэхэд ахиц дэвшил гаргах дипломат боломжуудыг үргэлжлүүлэн эрэлхийлэх болно" гэж мэдэгдэлд тэмдэглэсэн байна.
Эх сурвалж: ВАШИНГТОН, 2023 оны аравдугаар сарын 24 /RT/
