АНУ-ын ерөнхийлөгч Жо Байден БНХАУ-ын дарга Си Жин Пинг Сан-Франциско хотод хүлээн авч, хэлэлцээр хийжээ. Тэдний уулзалт бүтэн дөрвөн цаг үргэлжилж, төгсгөлд нь хамтдаа салхилснаар өндөрлөсөн байна. - Хоёр улсын Батлан Хамгаалахын сайд нарын ажил хэргийн уулзалт, далай тэнгис дэх дайны аюулгүй байдлыг сахих талаар механизмаа тогтоосон зөвшилцөлд тулгуурлан, харилцан бие биенээ хүндэтгэсэн дээд хэмжээний уулзалт боллоо гэж Хятадын Төв телевиз дүгнэлээ. - " Маш чухал, дэвшил ахиц гаргасан, үр өгөөжтэй уулзалт боллоо" гэж АНУ-ын ерөнхийлөгч Джо Байден өөрөө жиргэв. " АНУ - Хятад улс өөр хоорондоо зөрчилдвөл засаж залруулж дийлэхгүй хор холбогдол дагуулна" гэж Хятадын дарга Си Жин Пингийн хэлсэн үгийг ч дэлхий нийт онцоллоо. "Зөрчилдөх биш өрсөлдөж болно. Зөв өрсөлдөөн бол хохирол үл дагуулна. Түүнийг хариуцлагатайгаар зохион байгуулахад учир оршино" гэж Джо Байден ч хэлээд авлаа. Ийнхүү их гүрнүүд батлан хамгаалахын салбарт хэл үгээ ололцож эхэлсэн нь уг дээд хэмжээний уулзалтын гол ач холбогдол гэж хэлж болох нь. Сүүлийн жилүүдэд Тайваны асуудлаас болж, АНУ-Хятад улсын хооронд дэгдэх гэж түгшээж байсан дайны гал ямартаа ч энэ удаад намжиж холдов бололтой. Харин энэ уулзалт нь миний ажиллаж, амьдарч буй газраас "самардах" хэмжээний ойрхон боллоо гэж Элбэгдорж хүү жиргэв. Сүүлийн жилүүдэд сураг нь алдарсан Элбэгдорж дассанаараа АНУ-даа суурьшжээ. Тэр Сайханбилэгээ барааджээ.
Ц.ЭНХБАТ