Европын удирдагчид Украин, Молдова улсуудыг Европын Холбоонд гишүүнээр /ЕХ/ элсүүлэх асуудлаарх хэлэлцээг тус хоёр улстай эхлүүлж, Гүржид нэр дэвшигчийн статус олгохоор шийдвэрлэжээ.
Украины Ерөнхийлөгч Владимир Зеленский Бельгийн нийслэл Брюссель хотноо болсон дээд хэмжээний уулзалтын үеэр гаргасан эл шийдвэрийг өөрийн орны болон Европын хувьд “ялалт” боллоо хэмээн сайшаасан байна.
Европын Зөвлөлийн тэргүүн Шарль Мишелийн хэвлэлийн төлөөлөгчийн мэдээлснээр, Европын улсуудын төр засгийн тэргүүн нар санал нэгтэйгээр дээрх тохиролцоонд хүрчээ.
Унгар улсын хувьд Киевтэй яриа хэлэлцээ эхлүүлэхийг удтал эсэргүүцсээр ирсэн боловч хориг тавьсангүй. Гэхдээ Унгарын Ерөнхий сайд санал өгөхөөс түдгэлзсэн бол бусад 26 улс дэмжсэн санал өгчээ.
2022 оны хоёрдугаар сард Оросын цэрэг Украин руу довтолсны дараа Украин, Молдова улсууд ЕХ-нд элсэх хүсэлтээ гаргасан бөгөөд тухайн оны зургаадугаар сард тус хоёр улсад нэр дэвшигчийн статус олгосон юм.
Молдова улсын Ерөнхийлөгч Майя Санду хэлэхдээ "Украинтай мөр зэрэгцэн ЕХ-нд элсэх үйл явцыг үргэлжүүлж байгаа нь бидний хувьд нэр төрийн хэрэг, Оросын түрэмгийллийг украинчууд зоригтой эсэргүүцээгүй бол бид өнөөдөр энд байхгүй байх байсан" гэжээ.
Эх сурвалж: БРЮССЕЛЬ, 2023 оны арванхоёрдугаар сарын 15 /BBC/
