Нийслэлийн нийтийн тээврийн маршрутын давхцал арилгахаар шинээр төлөвлсөн. Тодруулбал, Энхтайваны өргөн чөлөө, Чингэлтэйн өргөн чөлөө, Чингисийн өргөн чөлөөнөөс Наадамчдын зам, Их тойруугийн гудамж, Нарны зам, Хүннүгийн гудамжаар нийт зургаан чиглэлд 375 автобус зорчих юм.
Тус зургаан уртын чиглэлийг холбосон найман тойрог чиглэлд 92 автобус, бусад гудамж, замаар үйлчлэх богино эргэлтийн 40 чиглэлд 494 автобус үйлчилгээнд гарна. Түүнчлэн хот орчмын 15 чиглэлд 89 автобус явах юм. Харин их багтаамжийн автобус явах боломжгүй буюу хотын захын хорооллуудын таван чиглэлд 25 дунд багтаамжийн автобус явж, нийт 74 чиглэлд 1075 автобусаар иргэдэд үйлчилгээ үзүүлэхээр төлөвлөж байна.
Эдгээр чиглэлийн төлөвлөлт нь бүгд хоорондоо огтлолцож буйгаараа онцлогтой юм. Богино эргэлтийг хэрэгжүүлснээр 11-13 км/цаг байсан нийтийн тээврийн автобусны ашиглалтын хурд 18-20 км/цаг болж, 25 хувиар нэмэгдэх юм.
Түүнчлэн чиглэлийн эргэлтийн хугацаа дунджаар 100 минут байгааг 70 минут болгон багасгахаар төлөвлөжээ. Зорчигчдын дамжин суух давтамж нэмэгдэх хэдий ч зорчиход зарцуулах хугацааг 10-30 хувиар буурах тооцоог гаргасан байна.
Энэ сарын 20 буюу ирэх бямба гарагаас нийтийн тээвэр шинэ чиглэлээр иргэдэд үйлчилнэ.
Эх сурвалж: МОНЦАМЭ