Италийн Капра арал дээр “Их-7”-ийн бүлгийн гадаад хэргийн сайд нарын ээлжит уулзаж зохион байгуулагдаж байна. Лхагва гарагт эхэлсэн энэхүү уулзалтад АНУ, Их Британи, Франц, Герман, Канад, Японы гадаад хэргийн сайд нар хүрэлцэн иржээ. Тэд гурван өдрийн турш үргэлжлэх уулзалтаар Газын зурвас, Ойрхи Дорнодын асуудал болон Украин дахь нөхцөл байдлуудын талаар хэлэлцэх юм.
Энэ удаагийн “Их-7”-ийн бүлгийг даргалж буй Италийн гадаад хэргийн сайд Антонио Таяни хурлыг нээж хэлсэн үгэндээ “Бид энх тайвны төлөө ажиллах ёстой” хэмээн онцлов. АНУ-ын зүгээс ойрын хугацаанд Тегераны пуужин болон нисгэгчгүй онгоцны хөтөлбөрүүдэд шинэ хориг арга хэмжээ авахаар төлөвлөж буйгаа мэдэгдэж холбоотнуудаа ижил төстэй арга хэмжээ авна гэж найдаж буйгаа илэрхийлсэн юм.
“Их-7”-ийн гадаад хэргийн сайд нарын уулзалтаар хэлэлцэх өөр нэг чухал асуудал бол Украин дахь ОХУ-ын түрэмгийлэл юм. Уулзалтын хоёр дахь өдөр Украины гадаад хэргийн сайд Дмитрий Кулеба, НАТО-гийн Ерөнхий нарийн бичгийн дарга Йенс Столтенберг нар хэлэлцээрт нэгдэхээр төлөвлөөд байна. ОХУ-ын хүчирхэг агаарын довтолгооны улмаас Киевт асар их хэмжээний хохирол учирч болзошгүй. Тиймээс холбоотнууд Украинд нийлүүлэх агаарын довтолгооны хамгаалалтын системийг нэмэгдүүлэх талаар хэлэлцэнэ хэмээн Германы талын албаны хүн мэдээлсэн байна. Гэвч Европын Холбооны зарим гишүүн орнууд ОХУ-ын эсрэг хийх алхмууд хууль ёсны дагуу эсэхэд эргэлзсэн хэвээр байгаа юм. Дэлхийн дахинд өрнөж буй эдгээр мөргөлдөөний асуудлыг анхааран үзэхээс гадна сайд нарын хурлаар өөр хэд хэдэн асуудлуудыг хөнгөж байна. Эдгээр нь Африк тивтэй харилцах барууны орнуудын харилцааг сайжруулах, бэхжүүлэх арга замуудыг тодорхойлох болон Энэтхэг-Номхон далайн бүс нутгийн тогтвортой байдлын талаарх яриа хэлэлцээрүүд юм. Мөн кибер аюулгүй байдал, хиймэл оюун ухаан, хуурамч мэдээний эсрэг тэмцэх зэрэг асуудлыг энэхүү уулзалтаар хэлэлцэнэ.
Эх сурвалж: www.polit.mn
