15 жилийн дараа эргэн нэгдсэн домогт “Oasis” рок хамтлагийн Их Британи, Ирландад хийх 17 тоглолтын тасалбар худалдаж эхлээд 10 цагийн дотор зарагдаж дуусжээ.
Тус хамтлаг эргэн нэгдэж буйгаа наймдугаар сарын 27-ны өдөр зарласан юм. Хамтлагийг үүсгэн байгуулагчид болох ах дүү Лиам, Ноэл Галлахер нар эхлээд 2025 оны долоодугаар сарын 4-нөөс наймдугаар сарын 17-ны хооронд Кардифф, Манчестер, Лондон, Эдинбург, Дублин хотуудад 14 тоглолт хийнэ гэж мэдээлсэн боловч Манчестер, Лондон, Эдинбург хотуудад гурван нэмэлт тоглолт хийхээр болжээ.
Тоглолтын тасалбарын худалдаа орон нутгийн цагаар бямба гаргийн өглөөний 09:00 цагт эхэлж, 19:00 цагт дууссан байна. Тасалбарын үнэ 75-500 фунт стерлингийн (100-650 ам.доллар) хооронд хэлбэлзэж байв.
1991 онд байгуулагдсан "Oasis" хамтлаг нь дэлхийн хамгийн алдартай, хамгийн амжилттай хөгжмийн хамтлагуудын нэг болсон билээ. Тус хамтлаг нь “Blur”, “Suede”, “Pulp” хамтлагуудын хамтаар брит-поп хөгжмийн урсгалыг дэлгэрүүлэгч юм. 1990-ээд онд Британийн сэтгүүлчид “Blur”, “Oasis” хамтлагуудын тэр үеийн өрсөлдөөнийг “брит-попын тулаан” гэдэг байлаа.
Эх сурвалж: ЛОНДОН, 2024 оны есдүгээр сарын 1 /TASS/
