Монголд "ардчиллын" хоёрхон зам бий болсон.
Нэг нь Ц.Элбэгдорж ерөнхийлөгчийн хэлснийг үг дуугүй дагах. Нөгөө нь, үл дагах, тэгээд шоронд суух.
Ц.Элбэгдорж ерөнхийлөгчтэй анхнаасаа гар гараасаа барилцан зүтгэж явсан, ардчиллын төлөө хамтран зүтгэгч, ерөнхий сайд, АН-ын дарга асан Н.Алтанхуяг байцаалт өгөхөөр АТГ-ын үүдэнд очиход, түүнийг тосон угтсан хэвлэлийнхэнд хандаж ингэж хэллээ.
АТГ, Хууль хүчний байгууллага улс төрчдийн захиалгаар ажилладаг болсон гэж тэр дахин тодотголоо.
"Миний ойр тойрны хүмүүсийг барьж хорьж, хэлмэгдүүлсэн. Үүнийгээ ч үргэлжлүүлж байна. Үгэндээ захирагддаггүй хүмүүст зориулсан коридор бий болгосон. Түүгээрээ айлгадаг. Би айхгүй. Харин үргэлжлүүлэн тэмцэх болно" гэж АТГ-ын байцаалтад орохын өмнө Н.Алтанхуяг мэдэгдлээ.
Энэ мэдэгдлийг ард түмэнд гэхээсээ илүү, Ц.Элбэгдорж ерөнхийлөгчид хандаж хэллээ гэж ажиглагчид дүгнэлээ. Алтанхуягийг 4 цаг байцаасан гэх мэдээлэл байна. Түүнийг хэр удахыг нь мэдэхгүй учир, хэвлэлийнхэн АТГ-аас бүгд явсан байлаа. Ямар ч гэсэн Н.Алтанхуягийн гэх тодотголтой хэргийг шалгах явц эрчимжлээ. Н.Алтанхуяг ч бас зүгээр суусангүй.
Тэр "Би Монгол улсын ерөнхийлөгчид нэр дэвшинэ. АН-ын даргад ч нэр дэвшинэ" гэдгээ мэдэгдсэн. Энэ бол "Ц. Элбэгдорж, Та сонс! Би хэзээ ч танд бууж өгөхгүй" гэж хэлж байх шиг сонсогдом үйл явдлын илэрхийлэл боллоо.
Тэр өөрийн фэйсбүүкдээ, - Тэмцдэггүй ард түмэн мөхдөг, урсдаггүй гол ширгэдэг. Монголыг маань сорчлон мөлжиж байгаа нам дамнасан бүлэглэлтэй, эцсээ хүртэл тэмцэнэ ээ. Дэмжээрэй, нэгдээрэй гэж өөрийн дэмжигчдэдээ хандаж уриалсан байна.
Аналист Ц.ЭНХБАТ