.JPG)
Он гарахад 4-хэн долоо хоног үлдээд байдаг, шинэ он гармагц бондын өр нэхэгдэнэ. Өрийг өрөөр буюу, зээл авч төлөхөөс өөр гарцыг Монголын Засгийн Газар олж харахгүй дээрээ тулжээ. Дээр нь улсын төсөв алдагдалтай байдаг.
Ядаж байхад Далай ламын айлчлалаас болоод Хятадын талаас авахаар хөөцөлдөж байсан 4,2 тэрбум ам.долларын зээлийн гэрээ хэлэлцээр зогссон. Монголын засгийн газрын зүгээс хичнээн ч чармайлт гаргаад, "Өнгөрсөн борооны хойноос цув нөмөрнө" гэгчийн үлгэртэй учирчээ. Хятадын Засгийн газар дураараа "дургисан", хувийн тоглолт хийсэн Монголын улс төрчдөд хариу барихаар шийдсэн алхмуудаа дэс дараалан авч эхэллээ гэж анзаарагдаж байна.
.JPG)
Эхний алхам нь эдийн засгийн шахалтыг үзүүлж, мэдрүүлж эхэлжээ. Зээлийн хэлэлцээрийг царцаасан. Хятад улс руу хийх төр, засгийн өндөр хэмжээний бүх айлчлалыг цуцалсан. Дээр нь, Ганц Модны гаалийн боомтоор нүүрс тээвэрлэж буй машин бүрээс 10 юань, ачсан тонн бүрээс нь 8 юань авах шинэ журмыг Далай ламыг Монголд айлчилж эхэлсэн өдрөөс нэвтрүүлжээ. Энэ нь 10 машинтай Монголын компани сардаа 16-20 сая төгрөгийн нэмэлт зардал төлөх болжээ.
Ийнхүү Монголын ганц, хоёрхон эрх мэдэлтний хувийн санаа зорилгоо хэрэгжүүлэх зорилгоор Далай ламыг Монголд айлчлуулсан нь, нийт Монголчуудын амьдралд, Монгол улсын хөгжлийн хувь заяанд сөргөөр нөлөөлж магадгүй болжээ.
Аналист Ц.ЭНХБАТ
