Намын даргад нэрээ дэвшүүлбэл зохих, гэхдээ нэрээ дэвшүүлэхгүй байгаа цөөхөн эрхмийн нэг бол УИХ, засгийн газрын гишүүнээр удаа дараа сонгогдсон Г.Батхүү юм. Түүнийг зангарагтай улс төрч гэдэг. АН Засаг барих тохиолдол бүрт ерөнхий сайдад түүний нэр нь ёс юм шиг заавал яригддаг байсан. Энэ бол түүх. 2016 оны УИХ-ын сонгуульд тэр бүдэрсэн. Тэглээ гээд сонгогчид хохирсноос, бүдэрсэн Г.Батхүү хохироогүй. Тэглээ гээд түүнийг улс төрөөс холдуулж чадахгүй. АН-ыг шинэчлэх тухай асуудлыг УИХ-ын сонгуульд ялагдсаны дараахнаас хүчтэй ярьж буй бол, Г.Батхүү аль 2016 оны хавраас эхлэн УИХ-ын гишүүн Лу.Болдын хамт МоАН-ыг байгуулах үеэсээ энэ тухай хэлэлцүүлгийг өрнүүлж эхэлсэн.
Тэр цаг үеийг угтаж харж чаддаг нэгэн. АН, түүний хөгжилд нэн эрэлт хэрэгцээ бүхий үнэ цэнтэй гишүүний нэг гэж түүнтэй хамтран зүтгэгчид түүнийг үнэлдэг. Асуудлын мөн чанарыг олж харж чаддаг, зохион байгуулах, удирдах чадварт мэргэшсэн улс төрчийн нэг. Асуудалд далайцтай ханддаг нэгэн. Г.Батхүү намын даргад дэвших тухай ганц ч үг гээхгүй байгаа нь, түүний хашир туршлагатай холбоотой гэж хэлэх ч нэгэн байна. Хэрвээ Г.Батхүү намын даргад өрсөлдвөл, маш хүчтэй өрсөлдөгч нэг байх нь тодорхой.
Ц.ХИШГЭЭ
