Ардчилсан намын даргын сунгаа ид дундаа өрнөж байна. Нэр дэвшигчид 21 аймгаар явж намынхаа нийт гишүүд дэмжигчдийг сэрээж тэдний урам зоригийг бадрааж байна. Намын шинэчилсэн бүртгэл 2016 оны 12 дугаар сарын 8-аас 2017 оны 1 дүгээр сарын 06-ныг дуустал орон даяар явагдсан билээ.
Шинэчилсэн бүртгэлд ардчилсан намын гишүүд болон тус намд элсэхээр хүсэлт гаргасан хүн бүр хамрагдах боломжтой байсан бөгөөд улсын хэмжээнд нийт 176,000 гаруй гишүүн бүртгүүлсэн дүн мэдээ гараад байгаа.
Тэгвэл Завхан аймгийн хэмжээнд нийт 6,654 гишүүн намынхаа шинэчилсэн бүртгэлд хамрагдсан байна. Шинэчилсэн бүртгэлийг зохион байгуулж, намын даргаа бүх гишүүдээрээ сонгуулахаар сунгаа зохион байгуулж байгаа нь намын гишүүдэд ихэд таалагдаж байгааг онцлох нь зөв биз ээ.
Намын гишүүдийн идэвх сэргэж байгаа нь цахим ертөнцөд нилээд ажиглагдаж байна. Тухайлбал, Монголын томоохон цахим мэдээллийн сайтууд АН-ын дарга хэн байх вэ гэдэг нээлттэй санал асуулгыг сунгаа эхэлснээс хойш явуулсан. Анхандаа иргэдийн идэвх сулхан байсан бол сүүлийн долоо хоногоос санал асуулгын дүн эрс өсчээ. Ардчилсан намын гишүүд намаа шинэчилж, шинэ даргаа сонгох ажилд ханцуй шамдан орсон нь харагдаж байна. Санал асуулга явуулж буй 9 мэдээллийн сайтаас 6 сайтад нь УИХ-ын гишүүн С.Эрдэнэ тэргүүлж явна. Өнгөрсөн сонгуулиар Ардчилсан намын лидерүүдээс ганцаараа торойж үлдсэн ялалтын буухиатай лидер бол яах араггүй С.Эрдэнэ билээ. Дүүргийн ИТХ-ын сонгуульд Баянгол дүүрэгт Ардчилсан нам 41 суудлаас 31 суудал авч үнэмлэхүй ялалт байгуулсан явдал нь үүний тод жишээ юм.
