АН-ын ерөнхий нарийн бичгийн даргын үүрэг гүйцэтгэгчээр томилогдсон Ц.Туваан АН-ын төв штабдаа өөрчлөлт хийлээ. Бодлого, Орон нутаг, Хэвлэл мэдээлэл, Олон нийттэй харьцах албаны хүмүүсээ олноор нь чөлөөллөө.
- АН хүчирхэг байя, гишүүддээ хүрч ажиллая, бодлогоо зөв танилцуулья, хэдхэн сарын дараа Монголд болох ерөнхийлөгчийн сонгуульд ялалт байгуулахын тулд энэ өөрчлөлтийг хийх ёстой. Шинэ зорилгыг хуучин багтай шийдэх боломжгүй гэж Туваан үзсэн тухай ойрын эх сурвалж мэдээлж байна. "Намын төв аппарат чадалтай хүмүүсээс бүрдэж байж хүчтэй ажиллана" гэж ерөнхий нарийн бичгийн даргын үүрэг гүйцэтгэгч Ц.Туваан хэллээ. - Хамгийн гол нь нэг баг болж, зангидсан гар шиг байж, өндөр сахилга баттай ажиллаж чадах, мэргэшсэн аппаратыг бий болгохыг хүсэж байна. Энэ бол Тувааны шаардлага. Өмнөх аппарат бол үүргээ гүйцэтгэж, үеэ өнгөрөөсөн гэдэг ойлголтыг тэр давхар өглөө.
Ц.Тувааны хувьд, АН-ын даргын сунгаанд С.Эрдэнийн штабт ажиллаж, улс орны хэмжээнд амжилттай ажиллаж чадах чадварлаг менежер гэдгээ харуулсан гэж намын нөхөд нь үнэлсэн байна. АН-ын даргыг сонгосноор шинэчлэлтийг хийлээ гэж үзэж болохгүй. Намыг хэн удирдах вэ? гэдэг бол маш чухал. Гэхдээ намын шинэ бүтэц, зөв зохион байгуулалт, намын бодлогыг хэрэгжүүлэх, үйл ажиллагааг авч явах, анхан шатны нэгжээс өгсүүлээд, намын төв штабад ажиллах эд эс нь түүнээс дутуугүй чухал гэж Ц.Туваан хэллээ. Туваан өөрчлөлтийг дороос нь биш, дээрээс буюу төв штабаасаа эхэллээ.
Э.ҮҮЛЭНЦЭЦЭГ
