2009 онд тэр уйлж унжсан. Аргагүй. Яагаад гэвэл, тэр дэвшсэн л бол ерөнхийлөгч болчих байсан. Харин түүний өмнүүр нэг "муур" гүйсэн. Тэгээд уйлахаас өөр арга зам түүнд үлдээгүй. Харин Ц.Элбэгдорж ерөнхийлөгчөөр сонгогдсоноос хойш Э.Бат-Үүлд ая тал зассан хэд хэдэн алхам хийсэн. Ямар ч гэсэн хотын дарга болоход нь түлхэц үзүүлсэн. Дараа нь хувийнхаа зүгээс талархал илэрхийлж Улсын баатар цолоор Э.Бат-Үүлийг шагнасан. Ийм л процесс болж өнгөрсөн.
Гэвч энэ бол Э.Бат-Үүлд хангалтгүй байжээ. Тэр дэвших хүсэлтээ дахин илэрхийллээ. Ямар ч гэсэн АН-аас дэвших нэг хүний нэр тодорлоо. Тэгэхээр Бат-Үүл АН дотроо нэр дэвших сунгаанд ялах шаардлагатай, эхний удаад. Ялж чадваас өөр намын нэр дэвшигчидтэй жинхэнэ өрсөлдөөнд оролцох боломж нээгдэнэ. Тэр ерөнхийлөгч болбол юу хийж чадах вэ? гэдгийг хотын дарга Э.Бат-Үүлээр хэмжих нь магад. Тэр хотыг утаанаас салгана гэсэн. Хичнээн их хөрөнгө зарсаныг иргэд мэдэхгүй. Гэхдээ үр дүнд хүрээгүй төдийгүй, гамшиг болсон гэдгийг нь АН-аас сонгогдсон ерөнхийлөгч Ц.Элбэгдорж зөвшөөрч, олон түмэнд зарласан. Хотын түгжрэлийг арилгаж, метро байгуулна гэсэн. Энэ бол сураг нь алдарсан. Хотын захиргааг Сонгинохайрханы гэр хороололд шилжүүлнэ гэж хэлсэн. Ард иргэдийнхээ дунд очно гэсэн, санаа нь. Тэр хоосон үг байсан.
Гэр хорооллыг хаус хороолол болгоно, улсын зардлаар төвийн цэвэр, бохир, халаалтад холбоно гэж гарч ирсэн. Энэ юу болсныг иргэд мэднэ. Иргэдээ сонсоно гэсэн. Гэтэл өөрийгээ иргэдээр биш, харин иргэдээс өөрийгээ төрийн цагдаа, хууль хүчний байгууллагаар хамгаалуулж, тусгаарласан. Тендерийг шударга явуулна гэсэн ЯАЛАА. Хүүдээ тендер олгосон гээд түүний тухай ярих хэлэх зүйл их байна. Тэр дэвших тусам энэ яриа хөөрөө газраас тэнгэрт дэгдэх бололтой. Тэр 2009 онд дэвшсэн бол гарах байсан. Харин өнөөдрийн Бат-Үүл бол 2009 оны Бат-Үүл биш ажээ. Тэр дахин уйлахад хүрэх бий дээ.
Нийтлэлч Ц.ЭНХБАТ
