МАХН хоёр хуваагдаж, МАН, МАХН гэж сонгуульд орсноос хойш нэг ч ялалт амсаагүй. 2012 оны УИХ, Нийслэл, Аймаг, дүүргийн сонгуульд ялагдсан. Дараа нь 2013 оны ерөнхийлөгчийн сонгуульд ч мөн ялагдсан. Алтанхуягийн гавьяа буюу дараалсан дөрвөн сонгуульд Ардчилсан Намаа ялалтад хүргэсэн удирдагч гэж яригддаг нь үүнтэй холбоотой. Түүний дараагийн улс төрийн нүүдэл зөв эсвэл буруу байсан гэдгийг цаг хугацаа л харуулна. МАХН-тай эвсэл байгуулах гэсний төлөө түүнийг нам болон засгаас түлхэн унагаасан. МАХН-тай тодорхой гэрээ хэлцэл хийх гэж оролдлого гаргасны төлөө З.Энхболд ч бас эсэргүүцэлтэй тулгараад амжсан. Тэгвэл МАХН-д өөр сонголт бас байж болохыг ойрын үеийн үйл явдал бэлхнээ өгүүлж эхэллээ. Эхнийх нь намынхаа баярыг хамтран тэмдэглэхээр боллоо. Улс төрчдийн хувьд энэ хамтын ажиллагаа хаа хүрч дуусах вэ? гэдэг сонирхол татсан сэдэв болж хувирав. Энэ хоёр нам эвсэх үү, нэгдэх үү? Сонгуульд хэрхэн оролцох вэ? гэдэг нь улс төрийн тоглолтын цоо шинэ нүүдэл, бодох бодлого болж хувирлаа. Хэрвээ МАН, МАХН 2016 оны сонгуульд хамтран орох шийдвэр гаргавал, Ардчилсан Намд өгөх эхний хүндхэн цохилт болно гэж судлаачид үзэж байна.
Тоймч Д.ГАНТУЛГА
