Түрүүлэх өрсөлдөөнд явж байгаа Тоттенхам, Арсенал Вайт Харт Лейн цэнгэлдэхэд туллаа. Тоглолт эхнээсээ ширүүн өрнөн Тоттенхамаас Алдервейлд, Кейн Арсеналаас Рамзи, Санчез нар гоолдон 2:2 харьцаатайгаар оноо хувааснаар тоглолтын үр дүн лигийг тэргүүлэгч Лестер Ситид ашигтай байдал үүсгэлээ. Харин Лестер Сити Ватфордын талбайд зочлон тоглож багийн лидер Рияд Махрезийн ганц гоолоор хожил байгуулан хүснэгтийн 2-т байгаа Тоттенхамаас 5 оноогоор тасарлаа. Манчестер Юнайтед улирлын турш тогтворгүй тоглолттой байгаагаа батлан Вест Бромвичд 1:0-ийн харьцаатай ялагдал хүлээлээ. Манчестер хотын нөгөө баг Манчестер Сити өнгөрсөн өмнөх тойрогт Ливерпульд 3:0-ээр хожигдоод байсан бол эсрэгээрээ энэ тойрогт Астон Виллаг 4:0-ээр бут ниргэлээ. Ливерпулийн хувьд энэ тойрогт Кристал Паллестай тоглон цаг дуусах мөчид Бентеке торгуулийн цохилтоо амжилттай болгосноор 2:1 харьцаатай ялалт байгуулан 3 оноо авч чадлаа. Челси Гүүс Хиддингийг ирснээс хойш лигтээ хожигдоогүй байгаа цувралаа үргэлжлүүлэн Стоүк Сититэй 1:1-ээр тэнцлээ. Мөн Саутхамптон Сандерланд 1:1 харьцаатай тэнцсэн байна. Вест Хам Эвертоныг талбайд нь 3:2-оор, Борнмут Нью-Кастилыг талбайд нь 3:1-ээр, Свонси Норвичийг 1:0-ээр тус тус хожлоо.
