Английн “Манчестер Юнайтед” клуб “Бенфика” төвийн хамгаалагч Уиктор Линделефийг 30,7 сая паундаар худалдаж авлаа. Өнгөрсөн улиралд лигтээ тааруу амжилт үзүүлж тавдугаар байр эзэлсэн “Улаан чөтгөрүүд” ийнхүү авьяаслаг залуу хамгаалагчаар арын шугамдаа хүч нэмж байна.
Швед хамгаалагч Линделеф “Бенфика” клубийн бүрэлдэхүүнд 185 тоглолтод оролцож 6 гоол оруулж байсан бол шигшээ багтайгаа 12 тоглолт хийж нэг гоол хийсэн юм. Энэ талаар Шведийн шигшээ багийн хагс хамгаалагч Себестиан Ларсон “Тэр маш хурдацтай өсөн дэвжиж, олон улсын тавцанд хүчтэй гарч ирсэн. Хамтдаа бэлтгэл хийх, тоглох бүрийд тэр надад хүчтэй сэтгэгдэл төрүүлдэг. Шведийн шигшээд Линделеф их чухал тоглогч. Энэ бол түүнийг өндөр зэрэглэлд тоглох цаг болсныг нотолж байгаа хэрэг. Английн лигийн хатуу ширүүн тоглолт түүнд зохино” гэж хэлсэн юм. Линделеф “Манчестер Юнайтед”-ын арын шугаманд Эрик Бэйли, Крис Смаллинг, Маркос Рохо нартай хамт тоглохоор болж байна. Түүнээс өмнө “Манчестер Юнайтед”-ын бүрэлдэхүүнд Шведээс довтлогч Хенрик Ларсон тоглож байсан билээ.
О.ДАШНЯМ
