Ирэх сарын 19-23-ны хооронд Тайландын нийслэл Бангкок хотод ирэх сарын 19-23-ны өдрүүдэд зохиогдох “Азийн 23 хүртэлх насны АШТ”-ний урьдчилсан шатны тоглолтуудад оролцох Монгол Улсын залуучуудын шигшээ багийн бүрэлдэхүүн тодорлоо.
Шигшээ багийн ахлах дасгалжуулагч Майкл Вайсс сүүлийн хоёр сарын турш шинжсэн хөлбөмбөгчдөөс шилдэг гэсэн 30 залууг өөрийн багт дуудсан. Дуудагдан тоглогчид багагүй хугацаанд бэлтгэл хийж МҮОХ-ны байранд байрлан нэг баг болж, “Хүрхрээ үндэсний дээд лиг”-ийн “Эрчим”, “Сэлэнгэпресс”, “Эф Си Улаанбаатар” клубүүдтэй нөхөрсөг тоглолтууд хийсэн юм. Тэдгээр тоглолт, бэлтгэлүүд дээр өөрийгөө харуулж чадсан болон өөрийн арга багтаа нэгтгэхээр эртнээс төлөвлөсөн шилдэг 23 тоглогчийг шигшээ багт албан ёсоор багтаалаа.
Монголын 23 хүртэлх насны залуучуудын шигшээ багийг “Хүрхрээ үндэсний дээд лиг”-ийн “Атлетик 220”, “Хоромхон”, “Эрчим”, “Дэрэн”, “Сэлэнгэпресс”, “Хангарьд”, “Гоёо Эф Си”, “Унаганууд”, “Улаанбаатар сити” гэсэн клубүүдэд тоглодог хамгийн шилдэг тоглогчид бүрдүүлэх болсон. Герман дасгалжуулагч Майкл Вайсс "Би шигшээ багтаа сэтгэл хангалуун байна. Манай тоглогчдод авьяас бий. Бид богино хугацаанд чамлашгүй ахиц гаргасан. Урт хугацаанд тогтмол бэлтгэлтэй байвал цаашид амжилтанд хүрэх бүрэн боломж байна" гэлээ.
Манай шигшээ баг “Азийн 23 хүртэлх насны АШТ”-ий “H хэсэг”-т Тайланд, Индонези, Малайз улсуудтай өрсөлдөнө. Тэмцээнээс өмнө Солонгост нэгдсэн бэлтгэл хийхээр ирэх сарын таванд эх орноосоо өмнө мордох бөгөөд наана нь 06 сарын 27-нд Монгол дахь легионеруудтай нөхөрсөг тоглолт хийх хуваарьтай байна.
.JPG)
