БНСУ-ын Мужу хотноо таеквондогийн насанд хүрэгчдийн Дэлхийн аварга шалгаруулах тэмцээн энэ өдрүүдэд үргэлжилж байна. 183 орны 1700 орчим тамирчин чуулаад буй энэхүү тэмцээнд Монголын таван тамирчин өрсөлдөж байгаа юм.
Тэмцээний эхний өдөр эмэгтэйчүүдийн 46 кг-ын жинд таеквондогийн үндэсний шигшээ багийн тамирчин М.Сувд-Эрдэнэ тулалдав. Тэрбээр эхний даваанд Японы тамирчин Maцуй Юунад 18:11 ялагдаж тэмцээнээ өндөрлүүлсэн юм.
Тэмцээний хоёр дахь өдөр эрэгтэйчүүдийн 74кг-д А.Нацагсүрэн тулаанаа хийлээ. Тэрбээр эхний тойрогт Канадын тамирчин Парк Эндрютэй сугалаа таарч 25:15 ялсан. Удаах тойрогт Туркменстаны Байрамов Полатыг ялж 16-д үлдэх тулаанд Египетийн Ейсса Сейфтэй оноолт таарч 30:19-өөр ялагдсан байна. Түүнтэй тулалдсан Ейсса Сейф өөрийн жиндээ дэлхийн чансааг тэргүүлдэг юм.