Оросод үргэлжилж буй “Холбоодын цом”-ын тэмцээний хагас шигшээгийн эхний тоглолт өнгөрсөн шөнө явагдлаа. Энэ шатанд 2016 оны Европын аварга Португал Өмнөд Америкийн аварга Чилийн шигшээ багтай тулсан юм. Тоглолтын эхний аюултай довтолгоог дөрөвдэх минутад Эдуарда Уаргас хийсэн ч Руй Патриушо амжилттай хаасан.
Үүний дараа Португалын багаас Андре Гомесд гоолын боломж гарч ирсэн ч ашиглаж чадаагүй. Ийнхүү нэгдүгээр үе тэнцээгээр өндөрлөж хоёрдугаар үед ч багууд гоол орсонгүй. Тоглолтын ялагчийг 11 метрийн торгуулийн цохилтоор шийдвэрлэхэд Чили хаалгагч Калауди Браво Рикардо Корежма, Жоа Моутино, Лиуш Нана нарын цохилтыг хааж багаа хожилд хөтөлсөн юм. Тоглолтын талаар Чилийн хаалгагч Калауди Браво “торгуулийн цохилтуудыг хааснаа санаандгүй явдал гэж би бодохгүй байна. Ийм амжилтад хүрэхийн тулд бид өрсөлдөгчөө сайтар судалж, бэлтгэлээ шаргуу хийж, хөдөлмөрлөсөн. Өрсөлдөгчийнхөө эсрэг тоглолтод бид маш сайн бэлдсэн. Юу хийхээ ч сайн мэдэж байлаа. Португалийн шигшээд гоол оруулах олон боломж гарсан. Гэвч тоглолт тэнцүүхэн боллоо. Манай багийн амжилтын гол үндэс бол өөрсдөдөө бүрэн итгэдэг зан чанар. Хожихыг үнэхээр их хүсч тэмүүлбэл ямар ч амжилтад хүрч болдог” гэж ярьсан байна. Тэмцээний хагас шигшээгийн сүүлийн тоглолт Герман болон Мексикийн багуудын хооронд өнөө шөнө явагдана.
.JPG)
