Өнөөдөр Хөх хотод эхэлсэн жудо бөхийн гранпри тэмцээний хэсгийн барилдаанууд үргэлжилж байна. Энэхүү тэмцээнд зодоглож буй 2013 оны Дэлхийн аваргын мөнгөн медальт МУГТ Д.Амартүвшин “А” хэсэгт багтсан бөгөөд эхний даваанд гоц мөргөж хоёрдугаар тойрогт Ардчилсан Солонгосын тамирчин Парк Ён Намыг хожиж хэсгийн аваргын төлөө барилдахаар шалгарч үлдлээ. Тэрээр “А” хэсгийн аваргын төлөө Чехийн тамирчин Павел Петриковтой барилдана.
Мөн “B” хэсэгт багтсан 2014 оны Дэлхийн аварга Г.Болдбаатар эхний тойрогт гоц мөргөж хоёрдугаар тойрогт БНХАУ-ын Бу Хег хожсон. Улмаар хэсгийн аваргын төлөө ОХУ-ын Роберт Мшибаздетэй өрсөлдөхөөр шалгарч үлдээд байна. Манай тамирчид хожсон тохиолдолд шилдэг дөрөвт шалгарч мөнгөн медалийн төлөө хүч үзнэ.
О.ДАШНЯМ